სტრატეგია აღმაშენებლის ლიდერმა, გიორგი ვაშაძემ რუსთავის მე-12 პენიტენციურ დაწესებულება დატოვა.

მედიის წარმომადგენლებთან პირველ კომენტარის გაკეთებისას მან თქვა, რომ ოპტიმისტურადაა განწყობილი რადგან სჯერა, რომ "აუცილებლად გავიმარჯვებთ".

"ძალიან შემართებით, ოპტიმისტურად ვარ განწყობილი. მინდა მივესალმო საქართველოს, დარწმუნებული ვარ და მჯერა, რომ აუცილებლად გავიმარჯვებთ, რადგან ჩვენ გვინდა ვიცხოვროთ განვითარებულ ქვეყანაში, რომელიც არის ევროკავშირის წევრი, ისეთ ქვეყანაში გვინდა ვიცხოვროთ, სადაც ადამიანებს არ დაიჭერენ განსხვავებული აზრის გამო. 7 თვე რთული იყო, განსაკუთრებით შვილებს, ცოლს, ოჯახს როცა შორდები, მაგრამ რწმენა, რომ გავიმარჯვებთ იმდენად დიდია, რომ არცერთი დღე არ გამჭირვებია ნამდვილად. მინდა მადლობით დავიწყო. მადლობა მათ, ვისგანაც ბევრ წერილებს ვიღებდი, განსაკუთრებული მადლობა ემიგრანტებს, რომელთაგან ბევრ წერილს ვიღებდი. მინდა განსაკუთრებული პატივისცემა გამოვხატო სინდისის პატიმრების, რეჟიმის ყველა პატიმრის მიმართ. ის საოცარი სიმტკიცე, თავისუფლება რომელსაც ციხიდან ასხივებენ ყველას გვაძლიერებს. დიდი მადლობა მშობლებს, დედებს, საოცარი ბრძოლის ჟინი მოდის მათგან. ყოველდღე ტელევიზორს რომ ვუყურებდი და ვხედავდი, ეს მაძლიერებდა", — განაცხადა "სტრატეგია აღმაშენებლის" ლიდერმა გიორგი ვაშაძემ რუსთავის 12-ე დაწესებულების დატოვების შემდეგ.

საპატიმროს დატოვების შემდეგ, სტრატეგია აღმაშენებლის ლიდერმა, გიორგი ვაშაძემ პროკურატურის მიერ ოპოზიციონერი ლიდერებისთვის წარდგენილ ახალ ბრალზე ისაუბრა.

"რაც შეეხება ახალ საქმეს, ჩავრთე ტელევიზორი და გამოაცხადეს, რომ 15-წლიანი მუხლით მემუქრებიან. მომივიდა საქმე, რომელშიც არის ცარიელი ფურცელი, სახელი, გვარი და 15 წელი, მეტი არაფერი წერია. აი, საერთოდ არაფერია საქმეში.

მე უბრალოდ ვეუბნები საზოგადოებას, რომ ეს არის რეალობა, რაშიც ვცხოვრობთ. მე არ მინდა, რომ მარტო მე კი არა, არავინ იცხოვროს ამ რეალობაში და უკან დახევა კი არა, იქნება შემართება, მობილიზება, გვერდში დგომა, ერთმანეთის გამხნევება და წავალთ წინ. ვიბრძოლებთ იმისთვის, რომ მშობლებს და შვილებს ერთმანეთთან შეხვედრის შესაძლებლობა ჰქონდეთ.

არიან პატიმრები, მაგალითად, ლევან ხაბეიშვილი და სხვები, რომლებსაც შვილებს არ ახვედრებენ. შვილმა რა უნდა დააშავოს რა საქმეც არ უნდა იყოს? ამიტომ, ეს საქმე არის არაფერი. მაქვს მოლოდინი, რომ ეს საქმე შეწყდება. ჩვენ ამ საქმეშიც გავიმარჯვებთ და ბრძოლაშიც გავიმარჯვებთ და მე მაქვს რწმენა იმის, რომ ყველა ერთად ძლიერად შევაბიჯებთ ევროკავშირში", — თქვა გიორგი ვაშაძემ (კომენტარს "პუბლიკა" ავრცელებს).

რუსთავის ციხესთან მას ოჯახის წევრები, პარტიის წევრები, მხარდამჭერები და მედიის წარმომადგენლები დახვდნენ.

ის, "ოცნების" პარლამენტის დროებით საგამოძიებო კომისიას გამოუცხადებლობის გამო, 2025 წლის 24 ივნისს დააკავეს. მოსამართლე ნინო გალუსტაშვილმა მას 7 თვით თავისუფლების აღკვეთა მიესაჯა. მანამდე მან კომისიაზე გამოუცხადებლობისთვის დაკისრებული 50 000-ლარიანი გირაო გადაიხადა.

ვაშაძეს ბრალი სისხლის სამართლის კოდექსის 349-ე მუხლით ჰქონდა წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

გიორგი ვაშაძე რუსთავის მე-12 პენიტენციურ დაწესებულებას 23 იანვარს დატოვებს