დღეს, 23 იანვარს, თბილისის საქალაქო სასამართლოში ტროტუარზე დგომისთვის 5 მოქალაქეს ადმინისტრაციული პატიმრობა შეეფარდათ.

  • სანდრო მეგრელიშვილს — 4-დღიანი პატიმრობა (მოსამართლე დავით მაკარაძე);
  • დიმიტრი ჯამბურიას — 4-დღიანი პატიმრობა (მოსამართლე დავით მაკარაძე);
  • ლუკა ნაგლიაშვილს — 5-დღიანი პატიმრობა (მოსამართლე დავით მაკარაძე);
  • მიხეილ ზაქარეიშვილს — 5-დღიანი პატიმრობა (მოსამართლე ზვიად ცეკვავა);
  • ნუკრი კაკულიას — 4-დღიანი პატიმრობა (მოსამართლე მანუჩარ ცაცუა).

სასამართლო ქალ აქტივისტებთან მხოლოდ სიტყვიერი გაფრთხილებით შემოიფარგლა. მოსამართლეებმა ზვიად ცეკვავამ და მანუჩარ ცაცუამ ანი ახმეტელი და ნათია ჭავჭანიძე სამართალდამრღვევად ცნეს.

ამას გარდა, გუშინ, 22 იანვარს, სასამართლო რეზი დუმბაძეს შემთხვევაშიც სიტყვიერი გაფრთხილებით შემოიფარგლა.

ტროტუარზე დგომისთვის სისხლის სამართლის დევნა ემუქრებათ — აზერბაიჯანელ ჟურნალისტს, აფგან სადიგოვს; ექიმ ვაჟა გაფრინდაშვილს; აქტივისტებს — ანა ბდეიანს, გიორგი წულაიას, ლიზი უბილავას, კახა მიქაიას, კოკო მიქაიას, დავით ჭკადუას.

შეგახსენებთ, 2025 წლის 10 დეკემბერს, ოცნების ხელისუფლების პარლამენტმა შეკრება-მანიფესტაციის შესახებ კანონში ცვლილებები მიიღო, რომლის მიხედვითაც შეზღუდვა წესდება ხალხის მოძრაობის ადგილას შეკრებაზე. დაგეგმილი აქცია-დემონსტრაციის შესახებ დემონსტრანტებმა შსს 5 დღის ვადაში უნდა გააფრთხილონ. კანონპროექტში ასევე ვკითხულობთ, რომ უქმდება სახდელით სახით აღმკვეთი ღონისძიება და კანონის დარღვევის შემთხვევაში მოქალაქეს პატიმრობა ემუქრება.

აღნიშნული კანონპროექტის დარღვევის შემთხვევაში აქციის მონაწილეს 15 დღემდე პატიმრობა ემუქრება, ორგანიზატორს — 20 დღემდე. თუ ამ მუხლით სახდელდადებული პირი იგივე ქმედებას ჩაიდენს, მას სისხლისსამართლებრივი პასუხისმგებლობა დაეკისრება. სასჯელის სახედ კი გათვალისწინებულია თავისუფლების ერთ წლამდე აღკვეთა.