ბეირუთის ცენტრში მდებარე პოპულარულ ღამის კლუბში რეივერები ხმაურიანი ბასების ფონზე ცეკვავდნენ. ეს ახლო აღმოსავლეთის მორიგი ხალხმრავალი შაბათი იყო.

თუმცა ერთი განსხვავებული დეტალით: დიჯეი, რომელმაც ყურსასმენების გაკეთებამდე ლიბანურ კათოლიკურ უნივერსიტეტში მესა ჩაატარა.

DJ პადრე გილერმე

პადრე გილერმე მესას ატარებს

ფოტო: REUTERS/Raghed Waked

გილერმე პეიშოტუ, უფრო ცნობილი როგორც პადრე გილერმე, ჩრდილოეთ პორტუგალიის ერთ-ერთი სოფლის მღვდელია, რომელიც დღისით ქადაგებს, ღამით კი წვეულებებს მასპინძლობს.

52 წლის პადრე გილერმესთვის დიჯეობა რწმენის გამოხატვის, მშვიდობისა და თანაცხოვრების გზავნილის გავრცელების და ახალგაზრდებთან კავშირის დამყარების საშუალებაა.

კოვიდ-19-ის პანდემიის პერიოდში პეიშოტუმ ყოველკვირეული DJ-სეტების ლაივში გაშვება დაიწყო, სადაც ელექტრონულ საცეკვაო მუსიკას რელიგიურ და ფოლკლორულ მუსიკასთან აერთიანებდა. ამან მას "დიჯეი-მღვდლის" სახელით (DJ Priest) ფართო ცნობადობა მოუტანა.

2023 წელს მან ლისაბონში, ახალგაზრდობის მსოფლიო დღის ფარგლებში, ღია ცის ქვეშ დაუკრა, რაც სოციალურ მედიაში ვირუსულად გავრცელდა.

პეიშოტუს ასევე დაუკრავს რიო-დე-ჟანეიროში, ბრაზილიაში, ქრისტე მხსნელის ქანდაკების ქვეშ, და სხვადასხვა ფესტივალზე, მათ შორის ესპანეთსა და ჩილეში.

2025 წლის ნოემბერში პეიშოტუს კიდევ ერთი ცოცხალი შესრულება გახდა ვირუსული, როდესაც სლოვაკეთის ქალაქ კოშიცეში, წმინდა ელიზაბეთის ტაძრის წინ გამართულ სეტზე, რომელიც არქიეპისკოპოს ბერნარდ ბობერის 75 წლის იუბილეს ეძღვნებოდა, მოულოდნელად რომის პაპ ლეო XIV-ს მიმართვა გამოჩნდა.

პადრე გილერმე ბოლო თვეებში გლობალურ სენსაციად იქცა, ის მსოფლიოს სხვადასხვა ქვეყანაში მრავალრიცხოვანი აუდიტორიის წინაშე გამოდის და ინსტაგრამზე 2.6 მილიონი გამომწერი ჰყავს.