დონალდ ტრამპმა შაბათს თქვა, რომ ის სუპერბოულს არ დაესწრება და მკაცრად გააკრიტიკა ორი მუსიკალური არტისტი, რომლებიც 8 თებერვალს, კალიფორნიაში, სანტა-კლარაში დაგეგმილ ღონისძიებაზე უნდა გამოვიდნენ.

New York Post-თან საუბრისას პრეზიდენტმა, რომელიც 2025 წლის სუპერ ბოულს დაესწრო, თქვა, რომ ლევის სტადიონზე დიდ მატჩს არ დაესწრება, რადგან ის "უბრალოდ ძალიან შორსაა".

"სუპერ ბოულზე შესანიშნავად მხვდებიან. მათ ვუყვარვარ", — თქვა ტრამპმა — "წავიდოდი, უბრალოდ ცოტა უფრო ახლოს რომ იყოს".

დისტანციის გარდა, ტრამპმა ასევე გააკრიტიკა NFL-ის არჩევანი წლევანდელი სუპერ ბოულისთვის შერჩეულ არტისტებთან დაკავშირებით, კერძოდ, ჯგუფი Green Day, რომელიც მატჩამდე კონცერტს გამართავს, და ჰალფთაიმ შოუს მთავარი შემსრულებელი Bad Bunny.

დონალდ და ივანკა ტრამპები 2025 წლის სუპერბოულზე

ფოტო: Getty Images

"მე მათი წინააღმდეგი ვარ", — თქვა ტრამპმა არტისტებზე — "ვფიქრობ, ეს საშინელი არჩევანია. ეს მხოლოდ სიძულვილს თესავს. საშინელება."

ტრამპმა Bad Bunny-სა და ჰალფთაიმის შოუს შესახებ, რომელმაც მემარჯვენე ფლანგზე დიდი აღშფოთება გამოიწვია, გასული წლის ოქტომბერშიც ისაუბრა. "მასზე არასდროს მსმენია. არ ვიცი, ვინ არის. არ მესმის, რატომ აკეთებენ ამას, სიგიჟეა. მერე კი ყველაფერს იმ პრომოუტერს აბრალებენ, რომელიც გასართობ პროგრამას არჩევს. აბსოლუტურად აბსურდულია", — თქვა მაშინ ტრამპმა.

როგორც Bad Bunny-ს, ისე Green Day-ს წლების განმავლობაში არაერთხელ გაუკრიტიკებიათ პრეზიდენტი მისი ორივე ვადის განმავლობაში. ჯგუფის ვოკალისტმა ბილი ჯო არმსტრონგმა, 2016 წელს American Music Awards-ზე დამსწრე აუდიტორიაც ჩართო ტრამპის წინააღმდეგ სკანდირებაში, როცა სცენაზე გამოსვლისას ყვიროდა: "არა ტრამპს! არა კუ-კლუქს-კლანს! არა ფაშისტ ამერიკას". ახლახან კი, არმსტრონგმა მინესოტაში ICE-ის მოქმედებები დაგმო.