"ჟურნალისტი მზია ამაღლობელი ქართველების ოცნებებს ციხიდან იცავს" — ამ სათაურით ჯორჯ ბუშის საპრეზიდენტო ცენტრი ბათუმელებისა და ნეტგაზეთის დამფუძნებლის, მზია ამაღლობელის საქმეს ეხმიანება.

ცენტრი მზია ამაღლობელის დაკავებას და სასამართლო პროცესს არაპროპორციულ დასჯად ქმედებად აფასებს და საქართველოში მიმდინარე მოვლენებს უკავშირებს.

ცენტრი აშშ-სა და ევროკავშირს მოუწოდებს საქართველოს გვერდით დაუდგეს და გადამწყვეტი ნაბიჯები გადადგან — დაასანქცირონ ოცნების წარმომადგენლები და დაიცვას საქართველო "რუსეთის, ჩინეთისა და ირანის მავნე გავლენისგან".

"აშშ-სა და ევროკავშირს უნდა დაუდგნენ მხარში იმ ქართველების უმრავლესობას, რომლებიც ქვეყნის დასავლეთთან დაახლოებას ითხოვენ, მიუხედავად იმისა, რომ მმართველი პარტია ცდილობს საქართველოს რუსეთისკენ შემობრუნებას.

1991 წელს საბჭოთა კავშირისგან დამოუკიდებლობის მოპოვების შემდეგ, საქართველოს დასავლეთთან მჭიდრო პარტნიორობა აქვს ჩამოყალიბებული.

დემოკრატიული ინსტიტუტებისა და თავისუფლებების დასაცავად აუცილებელია გადამწყვეტი ნაბიჯები, მათ შორის — საქართველოს ლიდერების სანქცირება დემოკრატიული პროცესებისა და ინსტიტუტების შელახვის გამო. საქართველოს დემოკრატიული ინსტიტუტების მხარდაჭერა საუკეთესო გზაა ქვეყნის სუვერენიტეტის გასამყარებლად რუსეთის, ჩინეთისა და ირანის მავნე გავლენის წინააღმდეგ, რომელსაც ქართული ოცნება კარს უხსნის," — ვკითხულობთ განცხადებაში.

მზია ამაღლობელი, საბჭოთა კავშირის დაშლის შემდეგ, პირველი პოლიტიკური პატიმარი ჟურნალისტი ქალია საქართველოში. იგი 2025 წლის 11-12 იანვრის ღამეს, ქალაქ ბათუმში მიმდინარე საპროტესტო აქციაზე, ორჯერ დააკავეს. თავდაპირველად დააპატიმრეს ბათუმის პოლიციის სამმართველოს დამხმარე სათავსოს კედელზე საპროტესტო სტიკერის გაკვრისათვის, რომელზეც ეწერა — "იფიცება საქართველო". ეს სტიკერი პოლიციელებმა გაკვრისთანავე მოხსნეს. დაკავებიდან რამდენიმე საათში, მზია ამაღლობელი ხელწერილის საფუძველზე გაათავისუფლეს, თუმცა, მალევე კვლავ დააკავეს ბათუმის პოლიციის უფროსის — ირაკლი დგებუაძისთვის — სილის გაწვნისთვის.

ჟურნალისტის წინააღმდეგ გამოძიება დაიწყო სისხლის სამართლის კოდექსის 353 პრიმა მუხლის პირველი ნაწილით. მზია ამაღლობელს აღკვეთის ღონისძიების სახით წინასწარი პატიმრობა ჰქონდა შეფარდებული. 2025 წლის 6 აგვისტოს ბათუმის საქალაქო სასამართლოს მოსამართლე ნინო სახელაშვილმა მზია ამაღლობელს ბრალი გადაუკვალიფიცირა სისხლის სამართლის 353-ე მუხლის პირველი ნაწილით და 2-წლით თავისუფლების აღკვეთა მიუსაჯა.