ოცნების პარლამენტის ვიცესპიკერი, გიორგი ვოლსკი ბოდბელი ეპისკოპოსის, იაკობის ქადაგებას გამოეხმაურა და აღნიშნა, რომ სასულიერო პირი "პოლიტიკურ განცხადებებს ამ დონეზე არ უნდა აკეთებდეს." მისივე თქმით, სასულიერო პირები არც ერთ მხარეს ბრალს არ უნდა სდებდნენ და მათ ერთობისკენ უნდა მოუწოდებდნენ. მისივე განმარტებით, აზრთა სხვადასხვაობა უნდა იყოს განხილული პარლამენტში და არა ქუჩებში.

"მე მგონია, რომ მეუფე იაკობი სასულიერო პირია და პოლიტიკურ განცხადებებს ამ დონეზე არ უნდა აკეთებდეს. ბრალს არ უნდა დებდნენ რომელიმე მხარეს, როგორი პოლიტიკური გემოვნებაც არ უნდა ჰქონდეთ. პირიქით, ორივე მხარეს უნდა მოუწოდებდნენ ერთობისაკენ და უნდა იყვნენ მოწოდებული, რათა განსაცდელი აარიდონ ქვეყანას — როგორც "მამაო ჩვენოშია" ნათქვამი, თუმცა არქიმანდრიტმა კვარაცხელიამ დამაბრალა, რომ თურმე მე "მამაო ჩვენოც" არ ვიცი... ძალიან ცუდია, რომ არქიმანდრიტი იქნება, ეპისკოპოსი იქნება, სასულიერო თუ არასასულიერო პირი და რომელი კონფესიის წარმომადგენელიც არ უნდა იყოს, ვერ ხედავს იმ მზაკვრულ გეგმას, რომელიც საქართველოს წინააღმდეგ დასახეს და ამ მზაკვრულ გეგმაში ერთ-ერთი სერიოზული აქტი, ერთ-ერთი სერიოზული მიმდინარეობა არის საზოგადოების გახლეჩა... აზრთა სხვადასხვაობა უნდა იყოს განხილული პარლამენტში და არა ქუჩებში,მით უმეტეს, თუკი მოლოტოვის კოქტეილებს ისვრიან ადამიანები. არ შეიძლება მოლოტოვის კოქტეილის მსროლელის მხარეს დადგე და თქვა, რომ საზოგადოება ხელისუფლებამ გახლიჩა", — თქვა გია ვოლსკიმ

ცნობისთვის, მეუფე იაკობმა თავის ქადაგებაში ნათლისღების დღესასწაული მიულოცა მთავრობას, ოპოზიციას და აქციის მონაწილეებს და აღნიშნა, რომ საქართველოს ისტორია არც ახლა იწყება, არც 2003 წლიდან დაწყებულა, არც 2012-დან დაწყებულა და საზოგადოებას შერუგებისკენ მოუწოდა.

"ამ დიდ დღეს [ნათლისღებას] ჩვენს მთავრობას და მხედრობას ვულოცავ, ჩვენს ოპოზიციას ვულოცავ, ჩვენს იმ ადამიანებს ქუჩებში რომ დარბიან, თუმცა ნამდვილად არ ვიცი რატომ დარბიან, რა უნდათ, მაგრამ ისე ყოფილიყოს, რომ ყველას ერთად ერთი დიდი საქმე გვეკეთებინოს, ქართული საქმე... ნურავინ ნუ დავიბრალებთ, რომ — ჩვენ რომ არ ვყოფილიყავით არაფერი არ იქნებოდა — საქართველოს ისტორია არც ახლა იწყება, არც 2003 წლიდან დაწყებულა, არც 2012-დან დაწყებულა...

ერთმანეთი აღარ დავჭამოთ, გვეყო ეს ყველაფერი. რაღაცა შეცდომებს პატიობს ქრისტე და ჩვენც რაღაც ისე გავაკეთოთ. დავუძახოთ, მოვიდნენ მაინც და დაველაპარაკოთ. მთავრობამ და ეკლესიამ ერთად დავუძახოთ. ჩვენ რამდენი წელია ვიძახით შევრიგდეთ, შევრიგდეთო. ხან ვინ გამოხტება, ხან ვინ გამოხტება და ერთმანეთს როგორ მიმართავენ. მოვითხოვოთ, რომ შერიგებისკენ წავიდეთ და თუ ვინმე არ წავა, თავისი ის არის... მერე ყველა ვნახავთ ვის უნდა და ვის არ უნდა მშვიდობა. არ შეიძლება ოჯახების გაყოფა, მეგობრების წაჩხუბება.ეს არის ველურობა — სხვა არაფერი არ არის. მოდი, მაგაში შევეჯიბროთ ერთმანეთს. საქართველოსთვის სიკეთე ვაკეთოთ ყველამ ერთად. არ ვიტრაბახოთ "მე რომ არა, მე რომ არა". არავინ არ არის შეუცვლელი", — თქვა მეუფე იაკობმა.