"7-ჯერ არის გაზრდილი გასული 5 წლის განმავლობაში ტვირთების მოცულობა შუა დერეფანში, რაც ადასტურებს იმას, რომ ალტერნატიული კორიდორი არ ქმნის საფრთხეს საქართველოსთვის", — ამის შესახებ ოცნების პრემიერმა სამთავრობო ტელეკომპანია "იმედის" ეთერში განაცხადა. მისი თქმით, მიესალმებიან "მეზობლებს შორის ურთიერთობების აღდგენას".

"ჩვენ მივესალმებით ჩვენს მეზობლებს შორის ურთიერთობების აღდგენას და მათ შორის, სავაჭრო-ეკონომიკური ურთიერთობების განვითარებას. რაც შეეხება ჩვენს სატრანზიტო ფუნქციას, ჩვენ ძალიან დიდ ინვესტიციებს ვდებთ სატრანზიტო ფუნქციის განვითარებაში, ეს ეხება საგზაო ინფრასტრუქტურას, პორტებს, აეროპორტებს, სხვადასხვა ტიპის ინფრასტრუქტურულ ობიექტებს. ეს ეფუძნება დადებით მოლოდინებს ტრანზიტის მუდმივ ზრდასთან დაკავშირებით. მინდა, მარტივი მაჩვენებელი მოვიტანო, რაც ადასტურებს იმას, რომ ალტერნატიული კორიდორი არ ქმნის საფრთხეს საქართველოსთვის - 7-ჯერ არის გაზრდილი გასული 5 წლის განმავლობაში ტვირთების მოცულობა შუა დერეფანში. ასეთ პირობებში, ჩვენი ერთადერთი ამოცანა არის ის, რომ ჩვენი ინფრასტრუქტურით მაქსიმალურად შევძლოთ დავეწიოთ ამ მზარდ ტვირთბრუნვას. ასეთი ზრდის პირობებში ალტერნატიული კორიდორი იქნება მხოლოდ და მხოლოდ შემავსებელი ჩვენი ტრანზიტული ფუნქციისთვის. ამიტომ, ეს ყველაფერი არის ცარიელი სპეკულაციები. ჩვენ მომავალშიც განვაგრძობთ მაქსიმალური ინვესტიციის ჩადებას ჩვენი ამ ე.წ. დაკავშირებადობის ფუნქციის განვითარებაში", — განაცხადა ოცნების პრემიერმა, ირაკლი კობახიძემ სამთავრობო ტელეკომპანია "იმედის" ეთერში.

შეგახსენებთ, რომ დავოსის ეკონომიკურ ფორუმზე აზერბაიჯანის პრეზიდენტმა, ილჰამ ალიევმა განაცხადა, რომ "ამჟამად ტვირთების გადაზიდვა საქართველოს გავლით ხორციელდება, მაგრამ ერთ დღეს ეს სომხეთის გავლით მოხდება. ერთ დღეს სომხეთი პირდაპირ გადაზიდვებს განახორციელებს აზერბაიჯანიდან და ეს დღე არც ისე შორსაა".