აშშ-ის პრეზიდენტის, დონალდ ტრამპის ადმინისტრაცია კუბის მთავრობაში ისეთ პირებს ეძებს, რომლებსაც შეუძლიათ წლის ბოლომდე კუბის კომუნისტური რეჟიმის დამხობის შესახებ შეთანხმების მიღწევაში დახმარება", — წერს The Wall Street Journal.

ამერიკული გამოცემა ანონიმურ ამერიკელ ოფიციალურ პირებზე დაყრდნობით ავრცელებს ინფორმაციას იმის შესახებ, რომ ტრამპის ადმინისტრაციას კუბასთან მიმართებით ჯერ "კონკრეტული გეგმა" არ აქვს, თუმცა ვენესუელის პრეზიდენტ ნიკოლას მადუროს მაგალითი "კუბისთვის ერთგვარ ნიმუშად და გაფრთხილებად" განიხილება.

გაზეთის ცნობით, ვაშინგტონი კუნძულის ეკონომიკას "კოლაფსის ზღვარზე მყოფად" აფასებს და კუბის მთავრობას "უფრო მყიფედ, ვიდრე ოდესმე" მიიჩნევს მადუროს მთავარი მოკავშირის დაკარგვის შემდეგ.

Wall Street Journal-ის ცნობით, მაიამისა და ვაშინგტონში კუბელ დევნილებთან და საზოგადოებრივი ორგანიზაციების წარმომადგენლებთან შეხვედრებზე აშშ-ის ადმინისტრაციის წარმომადგენლები აპირებენ, გამოავლინონ მოქმედი მთავრობის წევრი, რომელიც მზად იქნება "გარიგების დადებაზე".

ტრამპი კუბას პირდაპირაც დაემუქრა და თავის პლატფორმა Truth Social-ზე დაწერა: "ვურჩევ, შეთანხმებაზე წავიდნენ, სანამ ძალიან გვიანი არ არის."

როგორც ყოფილი ამერიკელი დიპლომატი რიკარდო ზუნიგა აღნიშნავს, რომელიც ადრე მონაწილეობდა აშშ-კუბის მოლაპარაკებებში, ცვლილებები ნაკლებად სავარაუდოა ფართო შიდა თანამშრომლობის გარეშე: "აქ არავინ არის მზად იმუშაოს აშშ-ის მხარეს", — ციტირებს მის სიტყვებს WSJ.

კუბის ოფიციალურმა პირებმა უკვე უარყვეს ვაშინგტონის მსგავსი მცდელობები. პრეზიდენტმა მიგელ დიას-კანელმა ხაზგასმით აღნიშნა, რომ არანაირი მუქარა ან ზეწოლის მცდელობა არ აიძულებს მთავრობას დათმობებზე წასვლას. მისი თქმით, კაპიტულაცია დღის წესრიგში არ დგას და ქვეყანა არ მიიღებს რაიმე იძულებას პოლიტიკური სისტემის შესაცვლელად.

კუბა დასავლეთ ნახევარსფეროში ერთ-ერთი ყველაზე ხანგრძლივი პოსტკომუნისტური რეჟიმია: ფიდელ კასტროს ხელისუფლებაში მოსვლიდან 1959 წელს, ქვეყანა ვაშინგტონთან ხანგრძლივ დიპლომატიურ დაპირისპირებაში იმყოფებოდა. ამერიკის ეკონომიკური ემბარგო 1960-იანი წლების დასაწყისიდან მოქმედებს და ჩარევის არაერთი მცდელობა იყო.