როგორც ალბათ უკვე იცი, ჰარი სტაილსი 4-წლიანი პაუზის შემდეგ მუსიკალურ ინდუსტრიას უბრუნდება. ინგლისელი პოპვარსკვლავის რიგით მე-4 სტუდიური ალბომი, სახელწოდებით Kiss All the Time. Disco, Occasionally და 12 სიმღერით, დღის სინათლეს 6 მარტს იხილავს. მანამდე კი, უკვე შეგვიძლია ახალი ჩანაწერის ჟღერადობას გემო გავუგოთ: 22 იანვარს ალბომის მთავარი სინგლის, Aperture-ის, პრემიერა შედგა.

ხუთწუთიანი სიმღერა დისკოს და ტრანსის ნაზავია. მისი თანაავტორი და პროდიუსერი კიდ ჰარპუნი გახლავთ, რომელსაც სტაილსის ყველა სოლო ალბომზე აქვს ნამუშევარი, მათ შორის, მის ყველაზე ცნობილ ჰიტებზეც: As It Was და Watermelon Sugar.

მართალია, Aperture პირველი სინგლია ალბომიდან, თუმცა, რეალურად, ჩანაწერის "ბოლო აკორდი" აღმოჩნდა. თითქოს, შეაჯამა ალბომის სათქმელი და ჩანაწერის ლამაზ შეფუთვად იქცაო, აღნიშნავს ჰარი.

სიმღერის პრემიერასთან ერთად, ცნობილი გახდა, რომ სტაილსი მსოფლიო ტურნეს იწყებს, რომელიც ჯამში შვიდ ქალაქსა და 50 კონცერტს მოიცავს. მაისიდან წლის ბოლომდე, პოპვარსკვლავი ეწვევა ლონდონს, ნიუ-იორკს, ამსტერდამს, სან-პაულუს, მეხიკოს, მელბურნსა და სიდნეის.

აღსანიშნავია, რომ ლონდონში დაგეგმილ კონცერტებზე ჰარის ცნობილი კანადელი მუსიკოსი შენაია ტვენი შეუერთდება. სტაილსის თქმით, ამით "წრე იკვრება", რადგან, როგორც აღმოჩნდა, მთელი ბავშვობა დედამისის მანქანაში სწორედ ტვენს უსმენდა ხოლმე.

სხვა ქალაქებში კი, ჰარის კონცერტებზე ასევე ვიხილავთ ინგლისელ დიჯეის Jamie xx-ს, ჯორჯა სმითს და შვედ პოპვარსკვლავ რობინს.

გრემის სამგზის მფლობელი ჰარი სტაილსი ბოლო რამდენიმე თვის განმავლობაში სხვადასხვა გზით მიანიშნებდა დაბრუნებას. დეკემბერში, როცა უკვე ბილბორდები გამოჩნდა წარწერით "We belong together" (ფრაზა Aperture-იდან), თითქმის ყველა ფანი დარწმუნებული იყო, რომ პოპვარსკვლავი მათ 2026-ში დიდ ამბებს ჰპირდებოდა...

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...