აღმასრულებელი დირექტორობის კანდიდატს, ირაკლი იმნაიშვილს სურს, რუსთავი 2 "გამარჯვებული ჟურნალისტებისა და თანამშრომლების ტელევიზიად" აქციოს. მისი თქმით, რუსთავი 2 იყო გამარჯვებული ხალხის ტელევიზია, მაგრამ ის "ხალხსაც და მფლობელებსაც მალევე წაართვეს". მისივე თქმით, გუნდმა პირველ რიგში ცენზურაზე უნდა გაიმარჯვოს, განურჩევლად იმისა სახელისუფლებოა ის, თუ ოპოზიციური.

როგორც არხის გენერალურმა დირექტორმა, პაატა სალიამ აღნიშნა იმნაიშვილის დასანიშნად მოლაპარაკებები უკვე დასკვნით ეტაპზეა. იმნაიშვილის თქმით, გადაწყვეტილების მიღების შემდეგ მისი მთავარი ამოცანაა, შეიქმნას სარედაქციო ხელშეკრულები, რომელსაც ექნება იურიდიული ძალა.

"მე გამიმართლა, რომ 14 წლის განმავლობაში, დღესაც, ვმუშაობ მსოფლიოში ყველაზე ავტორიტეტულ და გავლენიან მედიასაშუალებაზე [BBC]. ამ 14 წლის განმავლობაში სულ ყოველთვის მინდოდა საქართველოში ჩამომეტანა როგორც სტანდარტი, ასევე, უპრეცენდენტო გარანტია სარედაქციო დამოუკიდებლობის, რომელიც დასავლურ მედიაში არსებობს", — განაცხადა მან.

ირაკლი იმნაიშვილი რამდენიმე წელია ბრიტანეთში ცხოვრობს და ტელეკომპანია BBC-ში მუშაობსს. მანამდე ის ტელეკომპანია მზეში მუშაობდა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე. ტელეკომპანიის დირექტორის, პაატა სალიას თქმით, შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა, მეორე დღეს კი თითქმის სრული შემადგენლობით ჟურნალისტებმა. რუსთავი 2 დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვა P.S.-ის გუნდმა, რეგიონის ჟურნალისტებმა, კომედი არხმა და Comedi Group-მა.

ამავე თემაზე: