რუსთავი 2-ის გენერალური დირექტორის, პაატა სალიას განცხადებით, არხის აღმასრულებელ დირექტორად ირაკლი იმნაიშვილის დანიშვნა სურთ. ამის შესახებ მან ბრიფინგზე განაცხადა.

"ჩვენ კარგა ხანია ირაკლისთან გვაქვს საუბარი, რომ სათავეში ჩაუდგეს რუსთავი 2-ის, როგორც საინფორმაციო, ასევე, პროდაქშენის ნაწილს და მისი, როგორც აღმასრულებელი დირექტორის ხელმძღვანელობით წარიმართოს ტელევიზიის საქმიანობა", — განაცხადა სალიამ.

სალიას თქმით, მოლაპარაკებები დასკვნით ეტაპზეა და საბოლოო გადაწყვეტილება მალე გახდება ცნობილი. მისივე თქმით, რუსთავი 2-ში დარჩენილ თანამშრომლებს იმნაიშვილი უკვე წარუდგინა.

"ეს არის პროფესიონალი, რომელსაც არ სჭირდება დამატებითი წარდგენა. მას იცნობს მთელი საქართველო. ეს არის ერთ-ერთი პირველი ჟურნალისტი, რომელმაც თავისი კრიტიკულობით თავი დაამახსოვრა საზოგადოებას", — განაცხადა მან.

ირაკლი იმნაიშვილი რამდენიმე წელია ბრიტანეთში ცხოვრობს და ტელეკომპანია BBC-ში მუშაობს. მანამდე ის ტელეკომპანია მზეში მუშაობდა.

"14 წლის წინ მომიწია ოჯახთან ერთად საქართველოს დატოვება ჟურნალისტური საქმიანობის გამო. ჩემთვის ძალიან გასაგებია, რამდენად მძიმეა ჟურნალისტისთვის წავიდეს ტელეკომპანიიდან, რომელიც მისთვის არ არის მხოლოდ სამსახური და არის ოჯახი. გამიმართლა, რომ დღესაც ვმუშაობ მსოფლიოში ყველაზე ავტორიტეტულ მედიასაშუალებაში და ამ 14 წლის განმავლობაში სულ მინდოდა საქართველოში ჩამომეტანა ჟურნალისტური სტანდარტი, უპრეცენდენტო გარანტია სარედაქციო დამოუკიდებლობის, რომელიც დასავლურ მედიაში არსებობს" — განაცხადა იმნაიშვილმა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე. ტელეკომპანიის დირექტორის, პაატა სალიას თქმით, შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა, მეორე დღეს კი თითქმის სრული შემადგენლობით ჟურნალისტებმა. რუსთავი 2 დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვა P.S.-ის გუნდმა, რეგიონის ჟურნალისტებმა, კომედი არხმა და Comedi Group-მა.