სამაუწყებლო კომპანია რუსთავი 2-ის გენერალური დირექტორის, პაატა სალიას განცხადებით, რუსთავი 2-ის საინფორმაციო სამსახურის უფროსთან, ნოდარ მელაძესთან ერთად გათავისუფლდება არხის რამდენიმე ადამიანი. სალიას თქმით, ამ ადამიანებს აქვთ ინტერესთა კონფლიქტი არხთან:

"ჩვენთვის ცნობილია, რომ ამ ეტაპზე არხის მესაკუთრეს ხელს უშლის და შეუშლის ჰქონდეს საქმიანი, ნორმალური ურთიერთობა რამდენიმე ადამიანთან. მედიაში ხშირია განცხადებები სხვადასხვა ჟურნალისტების, მათ შორის, ის, რომ ჟურნალისტი, რომელიც არხზეა დასაქმებული აპირებს რაღაცის გასაჩივრებას, ან ის სხვასთან ერთად რაღაცას ასაჩივრებს, რომ შეცვალოს სტრასბურგის სასამართლოს გადაწყვეტილება. მივიჩნევთ რომ ასეთი ადამიანები ვერ იმუშავებენ არხზე".

რუსთავი 2-ის საქმე

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში დარჩა საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნოდა. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. 18 ივლისიდან რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა. რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს და კრიტიკული მედიის დახურვა სურთ.