"ყველაზე მეტად მაინტერესებს, რა აინტერესებს პროკურატურას", — ამის შესახებ საქართველოს ეროვნული ბანკის ყოფილმა პრეზიდენტმა, გიორგი ქადაგიძემ თიბისი ბანკის საქმეზე სასამართლოში გამოკითხვაზე მისვლის დროს განაცხადა.

როგორც გიორგი ქადაგიძე ჟურნალისტებს განუცხადა, თიბისი ბანკის საქმე კონკრეტული ჯგუფისა და ადამიანების არეალს და მეტ საჯაროობას საჭიროებს. მანვე აღნიშნა, რომ ამ საქმეში პარლამენტის როლის გაძლიერება და დროებითი საგამოძიებო კომისიის შექმნა აუცილებელია:

"ჩვენ ვნახეთ, რომ საპარლამენტო კომიტეტზე გაისმა ყველაზე უფრო ხმაურიანი განცხადებები და ბრალდებები. მიმაჩნია, რომ საგამოძიებო კომისია არის ყველაზე უფრო ადეკვატური გადაწყვეტილება იმ თვალსაზრისით, რომ კომისიის მანდატის ქვეშ ყველა მოქმედ და ყოფილ მოხელეს განმარტების გაკეთება აუცილებლად მოუწევთ", — განაცხადა გიორგი ქადაგიძემ.

გიორგი ქადაგიძე გამოკითხვაზე გუშინ, 6 მარტს დაიბარეს. სებ-ის ყოფილმა პრეზიდენტმა პროკურატურაში გამოკითხვაზე უარი თქვა და მოსამართლის თანდასწრებით გამოკითხვა მოითხოვა.

პროკურატურაში განმარტეს, რომ საქმე ეხება 2008 წელს თიბისი ბანკის საეჭვო ტრანზაქციას, რომელზეც გამოძიებას აწარმოებენ. ამ პერიოდში ქადაგიძე საფინანსო განყოფილების ხელმძღვანელი იყო.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

"გახარიას წერილი"

4 მარტს პარლამენტში საფინანსო კომიტეტის სხდომაზე გამოსვლისას მამუკა ხაზარაძემ განაცხადა, რომ არჩევნების წინ შინაგან საქმეთა მინისტრის, გიორგი გახარიასგან მუქარის წერილი მიიღო, რომლის მიხედვითაც, მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. მისი თქმით, გამოძების ნაცვლად, პასუხად მიიღო ბრიფინგი და ბრალდება ფულის გათეთრების საქმეზე. თუმცა, პროკურატურაში ხაზარაძის ბრალდება უარყვეს და განაცხადეს, რომ დაკითხვისას ბიზნესმენმა მუქარა მხოლოდ ეროვნულ ბანკთან მიმართებაში გამოიყენა.

თავად შინაგან საქმეთა მინისტრმა ბრალდებები უარყო და განაცხადა, რომ ეს არის "პრივილეგირებული ბიზნესმენის მცდელობა, პარლამენტიდან ჭორაობით იმუნიტეტი მოიპოვოს".

წერილთან დაკავშირებით ხაზარაძე სასამართლოში გამოკითხვაზე იყო. 6 მარტს გამართულ ბრიფინგზე პროკურატურამ განაცხადა, რომ მამუკა ხაზარაძის ბრალდებებს ვერ გადაამოწმებენ, რადგან ბიზნესმენის წარდგენილი დოკუმენტი კომპიუტერში დაბეჭდილი ტექსტია და ავთენტიკურობის დადგენა შეუძლებელია. გარდა ამისა საქმის პროკურორმა, არჩილ ტყეშელაშვილმა აღნიშნა, რომ მამუკა ხაზარაძე არ ასახელებს შუამავალს, ვინც მას წერილი მიაწოდა.

გაიგე მეტი: