თიბისი ბანკს მამუკა ხაზარაძესთან ერთად ბადრი ჯაფარიძეც ტოვებს. თიბისი ბანკის განცხადებით, დამფუძნებელი აქციონერები თიბისი ბანკის სამეთვალყურეო საბჭოში აღარ იქნებიან, თუმცა რჩებიან TBC Bank Group PLC (თიბისი ბანკის 100%-იანი აქციონერი ლონდონში) დირექტორთა საბჭოში, თავჯდომარის და მოადგილის პოზიციებზე.

ეროვნული ბანკის 2017 წლის მონაცემებით, მამუკა ხაზარაძე თიბისი ბანკში 13,98%, ხოლო ბადრი ჯაფარიძე 6,98%-ს ფლობს. აღნიშნული მონაცემები 2017 წლის შემდეგ ეროვნული ბანკის ვებგვერდზე აღარ განახლებულა.

თიბისი ბანკი ასევე აცხადებს, რომ წყვეტს სასამართლო დავებს ეროვნული ბანკის წინააღმდეგ და დაკისრებულ მილიონიან ჯარიმას გადაიხდის. ბანკში ამბობენ, რომ ითვალისწინებენ ქვეყნის საინვესტიციო იმიჯისთვის შესაძლო ზიანს და პატივს სცემენ ეროვნული ბანკის, როგორც კვალიფიციური რეგულატორის როლს.

დღეს, 21 თებერვალს თიბისი ბანკის სამეთვალყურეო საბჭოს თავმჯდომარემ, მამუკა ხაზარაძემ თანამდებობა დატოვა. ეროვნული ბანკი ხაზარაძის წასვლას მიესალმება და აცხადებს, რომ ეს დადებითად აისახება ბანკის გამჭირვალობაზე. მათი თქმით, თიბისი ბანკი ძლიერი და მდგრადი საკრედიტო ინსტიტუტია და სრულად აკმაყოფილებს ეროვნული ბანკის მიერ დაწესებულ ეკონომიკურ ნორმატივებსა და ლიმიტებს.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

რამდენიმე დღის წინ გამართულ პრესკონფერენციაზე მამუკა ხაზარაძემ თქვა, რომ დაწყებული გამოძიება ანაკლიის პორტის მშენებლობას საფრთხის ქვეშ აყენებს.