თიბისი ბანკის სამეთვალყურეო საბჭოს თავმჯდომარის, მამუკა ხაზარაძის განცხადებით, ის ბანკს ტოვებს. ამის შესახებ განცხადება მან ფეისბუქით გაავრცელა. გარდა ამისა ის წერს, რომ ბანკის სამეთვალყურეო საბჭომ ლონდონში გადაწყვიტა ეროვნულ ბანკთან სამართლებრივი დავები შეწყვიტოს.

როგორც ხაზარაძე თავის განცხადებაში წერს, თიბისი ბანკზე "შეტევის" შემდეგ საერთაშორისო აქციონერებმა თვეში 200 მილიონი დოლარის ზარალი მიიღეს.

"მივხვდი, რომ მიზანი ჩემი დისკრედიტაციაა, იმასაც მივხვდი, რომ აქ, ჩვენთან, წარმატებას ებრძვიან, მივხვდი, რომ კომპანიის ზრდას საქართველოში ლიმიტი უნდა ჰქონდეს დაწესებული. ჩემზე ასეთი თავდასხმა პირდაპირ აისახება ჩვენი ბანკის რეპუტაციაზე. ბანკი კი არ შეიძლება ხანგრძლივ სასამართლო დავაში იყოს თავის რეგულატორთან, მითუმეტეს თუ ეს უკანასკნელი არაა თავისუფალი თავის გადაწყვეტილებებში, მიუხედავად მისი კანონით მინიჭებული მაღალი ხარისხის დამოუკიდებლობისა", — წერს ხაზარაძე.

მანვე აღნიშნა, რომ არცერთ სახელმწიფო მოხელეს არ გამოუთქვამს სურვილი, პრემიერის და მისი მინისტრების ჩათვლით, რომ მათ შეხვედროდნენ და პირადად დაინტერესებულიყვნენ თიბისის საქმით:

"მიუხედავად იმისა, რომ რამოდენიმე მათგანს პირადად მივწერე და შესაბამისი დოკუმენტებიც გადავუგზავნე გასაცნობად, პასუხი არავისგან მოსულა. სამაგიეროდ მოვისმინე მათი ბევრი კომენტარი საჯარო სივრცეში".

რაც შეეხება სამშაბათს, 26 თებერვალს საკომიტეტო მოსმენას, ხაზარაძე ამბობს, რომ პარლამენტში მივა და დეპუტატებს საქმის დეტალებს გააცნობს. ამავე დროს, როგორც კერძო პირი, ხაზარაძე გააგრძელებს სასამართლო დავას საქართველოსა და უცხოეთში.

ხაზარაძის წასვლა On.ge-ს დაუდასტურეს თიბისი ბანკშიც, თუმცა მათთვის ჯერ უცნობია, აპირებს თუ არა ბანკის დატოვებას ბადრი ჯაფარიძე.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

რამდენიმე დღის წინ გამართულ პრესკონფერენციაზე მამუკა ხაზარაძემ თქვა, რომ დაწყებული გამოძიება ანაკლიის პორტის მშენებლობას საფრთხის ქვეშ აყენებს.

ამავე თემაზე: