ქუინსლენდის უნივერსიტეტის მეცნიერების ახალი კვლევის მიხედვით, ბოლო 20 წელიწადში დედამიწის ხელუხლებელი ტერიტორიების 10 პროცენტი განადგურდა, ანუ 3,3 მილიონი კვადრატული კილომეტრი - ავსტრალიის ტერიტორიის თითქმის ნახევრის ექვივალენტი.

ხელუხლებელი ტერიტორიები უმნიშვნელოვანესია ჩვენი პლანეტისთვის, რადგან რამდენიმე შეუცვლელ ფუნქციას ასრულებს. მაგალითად, სუფთა წყალი, საკვები და მედიკამენტები, სწორედ ამ ტერიტორიებზეა დამოკიდებული. ტყეები ნახშირორჟანგს ისრუტავენ და ჟანგბადს გამოყოფენ, ანელებენ ეროზიას და არეგულირებენ ამინდს. თუმცა, ამ სასარგებლო ფუნქციების მიუხედავად, პლანეტის ეკოლოგიური პოლიტიკა დიდად არ იცავს ამ ტერიტორიებს. კვლევის ხელმძღვანელი, ჯეიმს უოტსონი, ამბობს, რომ თუ დედამიწის ხელისუფალნი ამ პრობლემის იგნორირებას გააგრძელებენ, კაცობრიობა კატასტროფის წინაშე დადგება.

კვლევის ფარგლებში მეცნიერებმა პლანეტის ხელუხლებელი ტერიტორიები მონიშნეს და აღმოაჩინეს, რომ ამჟამად 30.1 მილიონი კვადრატული კილომეტრი კვლავ ხელუხლებელია. ტერიტორიების ძირითადი ნაწილი ავსტრალიაში, ჩრდილოეთ აზიაში, ჩრდილოეთ აფრიკასა და ჩრდილოეთ ამერიკაშია. ჯერ-ჯერობით ხელუხლებელი მონაკვეთები პლანეტის ფართობის 20 პროცენტს შეადგენს.

ამჟამინდელი მონაცემები 1993 წლის მასალას შეადარეს, რის შედეგადაც დადგინა, რომ 1990-იანი წლების შემდეგ სამხრეთ ამერიკის ხელუხლებელი ტერიტორიების 30, ხოლო აფრიკის 14 პროცენტი განადგურდა.

"ხელუხლებელი ტერიტორიების აღდგენა შეუძლებელია, ამ დროს მთელი ეკოსისტემა ქრება და აღარასოდეს უბრუნდება საწყის მდგომარეობას", აცხადებს ჯეიმს უოტსონი.