"მგონი, ქალბატონმა გიგაურმაც ბოლომდე მოიხსნა ნიღაბი", — ამ სიტყვებით გამოეხმაურა იუსტიციის უმაღლესი საბჭოს მოსამართლე წევრი სერგო მეთოფიშვილი საერთაშორისო გამჭვირვალობა — საქართველოს აღმასრულებელ დირექტორს, ეკა გიგაურს, რომელმაც ფეისბუქზე უზენაესი სასამართლოს კანდიდატების სიების განახლებისა და შერჩევის კრიტერიუმების გაწერის საკითხი შეაფასა.

ეკა გიგაურს ირაკლი კობახიძის განცხადებიდან გამომდინარე კითხვები უჩნდება, რადგან მოსამართლეობის კანდიდატების შერჩევის კრიტერიუმების გაწერის შემდეგაც კი შესაძლებელია მურუსიძე-ჩინჩალაძე უვადო მოსამართლედ დაინიშნონ.

"იმედია, ეხლა მაინც დარწმუნდა საზოგადოება იმაში, რომ ქალბატონ გიგაურს, ისევე როგორც ბევრ სხვა პოლიტიკოს, სინამდვილეში არ აინტერესებს არანაირი კრიტერიუმები, არ აინტერესებს ვენეციის კომისიის რეკომენდაციები, არ აინტერესებს თანამედროვე დემოკრატიული ქვეყნების პრაქტიკა, არ აინტერესებს საკუთარი ქვეყნის კონსტიტუცია და ა.შ.", — წერს სერგო მეთოფიშვილი

სერგო მეთოფიშვილი ეკა გიგაურს მოუწოდებს გაასაჯაროვოს მოსამართლეების ე.წ. შავი სია, რომლებიც სასამართლო სისტემაში არ უნდა დაინიშნონ.

ქალბატონო ეკა, მგონი დაღალეთ ყველა თქვენი "ფეიქ ფარსებით", "ფეიქ ანგარიშებით" და "ფეიკ ნიუსებით", ამიტომ, მივმართავ ქალბატონ გიგაურს და მისნაირად მოაზროვნე პოლიტიკოსებს — რომ აღარ დაღალოთ საზოგადოება გაანებეთ ამ ფარს თავი, თქვენ არამაირი კრიტერიუმები რეალურად არ გაინტერესებთ, თუ გაგაჩნიათ მოსამართლეების ე.წ. შავი სია, რომლებიც თქვენი აზრით არ იმსახურებენ დაწინეურებას, ერთხელ და სამუდამოდ გამოაჩინეთ ეს სრული სია!!!", — წერს მოსამართლე.

საქართველოს პარლამენტის თავმჯდომარემ, ირაკლი კობახიძემ იუსტიციის უმაღლესი საბჭოს მდივნათან, გიორგი მიქაუტაძესთან შეხვედრის შემდეგ განაცხადა, რომ უზენაესი სასამართლოს მოსამართლეებს იქამდე არ აირჩევენ, სანამ კანდიდატების შერჩევისა და წარდგენის კრიტერიუმები არ გაიწერება. მან ასევე განმარტა, რომ შემუშავებული კრიტერიუმები იმ მოსამართლეობის კანდიდატებზეც გავრცელდება, რომელთა სიაც უკვე პარლამენტშია. ირაკლი კობახიძის თქმით, კანდიდატების შერჩევის კრიტერიუმებსა და პროცედურებზე სასამართლო რეფორმის სამუშაო ჯგუფში იმსჯელებენ.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ. გიორგი მიქაუტაძის თქმით, ყველა მოსამართლე მზად არის გაიაროს ის კრიტერიუმები, რომელსაც პარლამენტი შეიმუშავებს.

"უზენაეს სასამართლოში უნდა იყოს მინიმუმ 28 მოსამართლე. დღეს არის მოქმედი 10 მოსამართლე. წარდგენილია - 10. ბუნებრივია, რომ ეს წარმოდგენილი 10 კანდიდატურა არაა საკმარისი. კიდევ იქნება. რა თქმა უნდა, იუსტიციის საბჭოს აქვს რესურსი პარლამენტს კიდევ წარმოუდგინოს კანდიდატურები, ეს საჭიროებაც არსებობს და ბუნებრივია ასე იქნება", — განაცხადა მიქაუტაძემ.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

ამავე თემაზე: