ამერიკის შეერთებული შტატების პრეზიდენტმა, დონალდ ტრამპმა კონსერვატიულ მარკ ლევინთან თოქ-შოუში საუბრისას განაცხადა, რომ "აბერ-ბაიჯანსა" და ალბანეთს შორის ომი შეაჩერა. ტრამპს საჯარო განცხადებებში არაერთხელ გასჭირვებია აზერბაიჯანის სწორად წარმოთქმა.

ტრამპის კომენტარები, როგორც ჩანს, აზერბაიჯანსა და სომხეთს შორის კონფლიქტსა და თეთრ სახლში მის მიერ ორგანიზებულ სომხეთის პრემიერმინისტრ ნიკოლ ფაშინიანსა და აზერბაიჯანის პრეზიდენტ ნიკოლ ფაშინიანს შორის ცოტა ხნის წინ გამართულ შეხვედრას უკავშურდებოდა. შეხვედრის დროს ორმა ლიდერმა ერთობლივ დეკლარაციას მოაწერა ხელი და სამშვიდობო ხელშეკრულების პარაფირება მოახდინა, თუმცა ხელი არ მოუწერიათ.

კომენტარები გაჟღერდა იმ დროს, როცა ტრამპმა ჩამოთვალა შვიდი კონფლიქტი, რომლებიც, მისი თქმით, საკუთარი პრეზიდენტობის მეორე ვადაში, პირველი ექვსი თვის განმავლობაში მოაგვარა. ის ამტკიცებდა, რომ ინდოეთ-პაკისტანის ომი "ყველაზე მარტივი" მოსაგვარებელი იყო და სომხეთ-აზერბაიჯანის კონფლიქტის განხილვა განაგრძო.

"ბევრი საოცარი, საოცარი რამ. თქვენ ნახეთ აბერ-ბაიჯანი. ეს იყო დიდი ამბავი, რომელიც 34, 35 წლის განმავლობაში ხდებოდა ალბანეთთან დაკავშირებით. დაფიქრდით ამაზე. ვგულისხმობ, რომ ეს წლების განმავლობაში გრძელდებოდა და მე გავიცანი ეს ხელმძღვანელები და ვაჭრობის წყალობით. ცოტათი მაინც მქონდა მათთან ურთიერთობა და ვკითხე: "რატომ ჩხუბობთ?" შემდეგ ვუთხარი: "თუ თქვენ ჩხუბს აპირებთ, სავაჭრო შეთანხმებას არ დავდებ". ეს სიგიჟეა," — თქვა ტრამპმა.

შემდეგ მან განაგრძო საკითხის განხილვა და აღწერა თეთრ სახლში ფაშინიან-ალიევის შეხვედრის გარემოებები.

"რაც არ უნდა იყოს, ერთი რამ მეორეს მოჰყვა და ეს საკითხიც მოვაგვარე. და ეს ისეთი საკითხი იყო, ხალხი ამბობდა — ამის მოგვარება შეუძლებელია. მაშინაც კი, როცა ორივე მათგანი ოვალური კაბინეტში მეჯდა ბოლოს, ხელმოწერის წინ, გვერდიგვერდ ისხდნენ, თავს არაკომფორტულად გრძნობდნენ და გაქცევას ცდილობდნენ, მაგრამ ერთი საათის შემდეგ უკვე ერთმანეთს ეხუტებოდნენ და ულოცავდნენ. სიმართლე რომ ვთქვა, ძალიან ლამაზი სანახავი იყო," — აღნიშნა ტრამპმა.

თეთრ სახლში გამართული შეხვედრის შედეგად ალიევმა და ფაშინიანმა ხელი მოაწერეს შვიდპუნქტიან დეკლარაციას, რომელიც მშვიდობისკენ მიმავალ პროგრესს და 17-პუნქტიან სამშვიდობო შეთანხმებას ითვალისწინებს. მიუხედავად ამისა, სამშვიდობო შეთანხმება ოფიციალურად ხელმოუწერელი რჩება, რადგან აზერბაიჯანმა სომხეთს წინაპირობის სახით კონსტიტუციის შეცვლა მოსთხოვა. უცნობია, როდის გაფორმდება საბოლოოდ სამშვიდობო ხელშეკრულება.

შეხვედრის ყველაზე ხელშესახები შედეგი, შესაძლოა, იყო გეგმის გამოცხადება, რომელსაც "ტრამპის მარშრუტი საერთაშორისო მშვიდობისა და კეთილდღეობისთვის" (TRIPP) უწოდეს და რომლის მიხედვითაც აზერბაიჯანი სომხეთის ტერიტორიის გავლით მის ანკლავ ნახიჩევანთან უნდა დააკავშიროს. მარშრუტის მართვას ჯერ კიდევ უცნობი ამერიკული კომპანია გეგმავს.

ფაშინიანმაც და ალიევმაც განაცხადეს, რომ ტრამპს მშვიდობის დარგში ნობელის პრემიაზე წარადგენდნენ, რასაც ის არ მალავდა, რომ დიდი ხანია სურდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.