აშშ-ის სპეციალურმა წარმომადგენელმა სტივ უიტკოფმა რუსული მედალი გადასცა იმ ამერიკელის ოჯახს, რომელიც 2024 წელს უკრაინის წინააღმდეგ რუსეთის მხარეს ბრძოლაში დაიღუპა. ამის შესახებ ინფორმაციას CNN ავრცელებს.

სტივ უიტკოფს "სიმამაცის ორდენი" ვლადიმერ პუტინმა ალასკაში შეხვედრისას გადასცა, რათა მას უკრაინის ფრონტზე დაღუპული 21 წლის მაიკლ გლოსის ოჯახისთვის გადაეცა. მაიკლ გლოსი CIA–ს მაღალჩინოსნის შვილი იყო.

"სიმამაცის ორდენი" რუსეთის ფედერაციის ჯილდოა, რომელიც, როგორც წესი, რუსეთის მოქალაქეებს უანგარო საქციელის, სიმამაცისა და გმირობის გამოხატვისთვის საგანგებო ვითარებებში ენიჭებათ, კატასტროფებისა და ომის დროს. CNN-ის ცნობით, უიტკოფისთვის, რომელმაც საკუთარი შვილი ოპიოიდის ეპიდემიის გამო დაკარგა, შვილის დაღუპვა ტრავმატული გამოცდილებაა, რომელიც პოლიტიკურ საზღვრებს სცდება. ამიტომაც, მან საჭიროდ მიიჩნია მედლის ჯულიანე გალინასთვის — CIA-ს ციფრული ინოვაციების დირექტორისთვის და მისი მეუღლისთვის გადაცემა.

ცნობისთვის, მაიკლ გლოსი 2024 წლის 4 აპრილს გარდაიცვალა. რუსული მედია წერს, რომ შემთხვევა, სავარაუდოდ, ბახმუტის მიმართულებით რუსული შეტევის დროს მოხდა.