კოალიცია ლელო — ძლიერი საქართველოს წევრი ოთო ფარულავა სასამართლომ 1000 ლარით დააჯარიმა. ამას გარდა, მოსამართლე თორნიკე ქოჩქიანის გადაწყვეტილებით, მას ჩამოართვა მართვის მოწმობა 3 წლის ვადით და აეკრძალა თანამდებობაზე დანიშვნც 5 წლის განმავლობაში.

ოთო ფარულავაზე ადმინისტრაციული სამართალწარმოება მას შემდეგ დაიწყო რაც 8 ივლისს ის და მასთან ერთად მყოფი კიდევ ორი პირი შსს-ის წარმომადგენლებს ნარკოლოგიური შემოწმებაზე არ გაჰყვნენ.

ფარულავას ადვოკატი მარიამ გაბრიელაშვილი ამბობს, რომ საპატრულო პოლიციის წარმომადგენელმა სასამართლო სხდომაზე ვერ თქვა, რატომ მოხდა "სპეცოპერაცია ოპოზიციური პარტიების ახალგაზრდა წარმომადგენლების მიმართ".

მისი თქმით, გადაწყვეტილებას სააპელაციო სასამართლოში გაასაჩივრებენ.

"საპატრულო პოლიციის წარმომადგენელმა ვერ გაგვცა პასუხი, თუ რატომ მოხდა სპეცოპერაცია ოპოზიციური პარტიების ახალგაზრდა წარმომადგენლების მიმართ 8 ივლისს. ეს იყო დადგმული სპეცოპერაციასავით. ერთდროულად აიყვანეს უამრავი აქტივისტი თუ ახალგაზრდა პოლიტიკოსი სწორედ ამ მუხლით და მას ჰქონდა ერთადერთი პასუხი, რომ ეს იყო შემთხვევითობა. ჩვენ უბრალოდ არ გვჯერა, რომ ეს იყო შემთხვევითობა. მიზანი იყო, რომ გაეშავებინათ და ჩირქი მოეცხოთ სხვადასხვა ოპოზიციური პარტიების ახალგაზრდა წარმომადგენლებისთვის. გასაჩივრებას ვაპირებთ აუცილებლად სააპელაციო სასამართლოში და აღნიშნულ საქმეს მივყვებით ბოლომდე. ამ დაჩქარებული წესით მიღებულ რეპრესიულ კანონმდებლობასაც ჩვენ როგორც იურისტები მივყვებით ბოლომდე," — განაცხადა ადვოკატმა "TV პირველთან"

ოთო ფარულავა 8 ივლისს მომხდარ ინციდენტს პოლიტიკურ დევნად აფასებს.

"როდესაც გაგვაჩერეს მე და ჩემი თანამებრძოლები, ჩვენთვის თავიდანვე ცხადი იყო, რომ ადგილი ჰქონდა პოლიტიკურ დევნას, ამიტომაც ჩვენ უარი განვაცხადეთ იმ მავნე პრაქტიკის დაბრუნებაზე და ამით ჩვენი პროტესტი გამოვხატეთ," — უთხრა TV პირველს ოთო ფარულავამ.

მისივე თქმით, რუსული რეჟიმის წინააღმდეგ ბრძოლა გრძელდება

"ჯარიმაც ბევრი მაქვს, უბრალოდ ამას დაემატა მართვის მოწმობა, მაგრამ ეს ბრძოლა მაინც გრძელდება რუსული რეჟიმის წინააღმდეგ და მე დარწმუნებული ვარ ვიცხოვრებთ ისეთ ქვეყანაში, სადაც პოლიცია არ მიიღებს პოლიტიკურ დავალებებს და არ შეასრულებს იმ ბინძურს პრაქტიკას, რასაც ახლა ახორციელებს ხელისუფლება იმ ადამიანების მიმართ, ვინც აქტიურ წინააღმდეგობაში არიან რეჟიმთან," — თქვა ფარულავამ.