ფრაქცია ენმ-ის თავმჯდომარე გორის საკრებულოში, ბექა ქორჩილავა სოციალურ ქსლეში წერს, რომ ფრაქცია "ნაციონალურმა მოძრაობამ" გორის საკრებულოში თავმჯდომარის, დავით რაზმაძის იმპიჩმენტის სამართლებრივი პროცედურები დაიწყო. მისი თქმით," ამ პროცედურისთვის საკმარისია საკრებულოს წევრთა 12 მანდატი. ფრაქცია ენმ-ის გარდა, საჭიროა პარტია "გახარია საქართველოსთვის" წევრთა 3 ხმაც.

"გორის საკრებულოს თავმჯდომარეს, დავით რაზმაძეს არაერთხელ გაუკეთებია პრორუსული და მოღალატეობრივი განცხადებები. თუმცა, გუშინ გამოქვეყნებული ინტერვიუ, სადაც ის მადლობას უხდის ოკუპანტებს 2008 წლის ომის დღეებში გორში შემოსვლისთვის, ყოველგვარ მორალურ და სამართლებრივ ჩარჩოებს სცილდება.

აქედან გამომდინარე, ფრაქცია "ნაციონალური მოძრაობის" წევრებს მიგვაჩნია, რომ რაზმაძემ დაუყოვნებლივ უნდა აიღოს პასუხისმგებლობა და გადადგეს დაკავებული თანამდებობიდან. წინააღმდეგ შემთხვევაში საკრებულომ უნდა განახორციელოს მისი იმპიჩმენტი.

ამ პროცედურისთვის საკმარისია საკრებულოს წევრთა 12 მანდატი. ჩვენი ფრაქციის გარდა, საჭიროა პარტია "გახარია საქართველოსთვის" წევრთა 3 ხმაც. იმედი გვაქვს, წინა შემთხვევისგან განსხვავებით,ამჯერად მივიღებთ მათ მხარდაჭერასაც.

მოვუწოდებთ გორის საკრებულოს სრულ შემადგენლობას, მათ შორის "გახარია საქართველოსთვის" და "ქართული ოცნების" იმ წევრებს,ვისთვისაც მტკივნეულია რუსი ოკუპანტების ქმედებები ჩვენს ქვეყანაში, — იხელმძღვანელონ მხოლოდ საკუთარი სინდისით,პატრიოტიზმით და მხარი დაგვიჭირონ კორუმპირებული,პრორუსი ჩინოვნიკის დავით რაზმაძის თანამდებობიდან ჩამოცილებაში", — წერს სოციალურ ქსელში ფრაქცია ენმ-ის თავმჯდომარე გორის საკრებულოში ბექა ქორჩილავა.

შეგახსენებთ, რომ გორის საკრებულოს თავმჯდომარემ, დავით რაზმაძემ NYT-თან ინტერვიუში თქვა, რომ რუსები გორში "მშვიდობისმყოფელებად მოვიდნენ და მადლობა ღმერთს, რომ ასე მოიქცნენ, რადგან მიშას ხულიგნები მთელ ქალაქს ძარცვავდნენ".