კინოკრიტიკოსთა საერთაშორისო ფედერაციის (FIPRESCI) თითქმის 100-წლიანი ისტორიის განმავლობაში პირველად, ვენეციის საერთაშორისო კინოფესტივალის ჟიურიში ქართველი კინომცოდნე იქნება. ჟურნალისტისა და აკადემიური საქმიანობის გარდა, ალექსანდრე გაბელია საქართველოს კინოკრიტიკოსთა და მკვლევართა ასოციაციას (GFCASA) ხელმძღვანელობს.

გაბელიას ნომინაცია მნიშვნელოვანი მოვლენაა ქართული კინოკულტურისთვის და ხაზს უსვამს FIPRESCI-ის ფედერაციის საქართველოში ოფიციალურად დაფუძნებული ეროვნული სექციის საერთაშორისო აღიარებას. ასოციაცია 2023 წლის ნოემბერში შეიქმნა და მისი არსებობა საქართველოს ევროპულ და გლობალურ კინოსამყაროში პოზიციის გაძლიერების მნიშვნელოვან ნაბიჯს წარმოადგენს.

ვენეციის 82-ე ფესტივალი ლიდოში 27 აგვისტოდან 6 სექტემბრამდე გაგრძელდება.

გაბელიასთან ერთად, ვენეციის ფესტივალზე FIPRESCI-ის ჟიურიში იქნებიან იზაბელ დანელი (საფრანგეთი), რიტა დი სანტო (ბრიტანეთი), მარია სოლე კოლომბო (იტალია), ჯოვანი სტილიანო მესუტი (იტალია) და მარსელო იანოტი (ბრაზილია). ჟიური ორ პრესტიჟულ ჯილდოს გასცემს: საუკეთესო ფილმს მთავარ კონკურსში და საუკეთესო ფილმს პარალელური პროგრამებიდან.

FIPRESCI 1930 წელს ბრიუსელში დაარსებული გლობალური ასოციაციაა, რომელიც აერთიანებს 50-ზე მეტი ქვეყნის კინოკრიტიკოსებს, მკვლევრებსა და ჟურნალისტებს. მისი მიზანია კინოკულტურის პოპულარიზაცია და წევრთა ინტერესების დაცვა.