რატომ არ მოაწერა ხელი ამერიკის შეერთებულმა შტატებმა ერთობლივ განცხადებას, რომელიც 2008 წლის აგვისტოს ომში რუსეთის ქმედებებს გმობს? ტელეკომპანია "ფორმულამ" აშშ-ს სახელმწიფო დეპარტამენტს კითხვით მიმართა, ხომ არ უკავშირდება ეს ვაშინგტონის პოლიტიკის ცვლილებას საქართველოს მიმართ?, რის პასუხადაც სახდეპმა საქართველოში აშშ-ის საელჩოს მიერ 7 აგვისტოს გავრცელებულ განცხადებაზე მიანიშნა, რომელშიც ამერიკა მორიგჯერ ადასტურებს თავის ერთგულებას საქართველოს სუვერენიტეტისა და ტერიტორიული მთლიანობის მიმართ.

"2025 წლის 7 აგვისტოს, აშშ-ის საელჩომ თბილისში გამოაქვეყნა Facebook-პოსტი, რომელშიც ნათქვამია: დღეს საქართველოში რუსეთის შეჭრიდან ჩვიდმეტი წელი გავიდა. ეს არის დღე, როდესაც ვიხსენებთ ომის მსხვერპლს, იძულებით გადაადგილებულ პირებს და მათ, ვინც სიცოცხლე ბრძოლაში დაკარგეს. ჩვენ ვხედავთ, როგორ სათუთად ინახავს მათი გმირობის ხსოვნას ქართველი ხალხი. სოლიდარობას გიცხადებთ და კიდევ ერთხელ გიდასტურებთ ერთგულებას საქართველოს სუვერენიტეტისა და ტერიტორიული მთლიანობის მიმართ," — აღნიშნავს უწყება.

2025 წლის 18 აგვისტოს, გაერო-ს უშიშროების საბჭომ დახურულ სხდომაზე რუსეთის მიერ საქართველოში ოკუპირებულ ტერიტორიებზე არსებული ვითარება და რუსეთ-საქართველოს კონფლიქტის საკითხი განიხილა. პირველად ამერიკის შეერთებულმა შტატებმა ხელი არ მოაწერა ერთობლივ განცხადებას, რომელიც 2008 წლის აგვისტოს ომში რუსეთის ქმედებებს გმობს.

შეხვედრის შემდეგ, გაეროს უშიშროების საბჭოს რამდენიმე წევრმა, მათ შორის დანიამ, საფრანგეთმა, საბერძნეთმა, გაერთიანებულმა სამეფომ და სლოვენიამ, ასევე ახალმა წევრმა ლატვიამ, პრესკონფერენცია გამართეს, სადაც სლოვენიის მუდმივი წარმომადგენლის მოადგილემ გაეროში, ონდინა ბლოკარ დრობიჩმა, ერთობლივი განცხადება წაიკითხა.

პირველად ამერიკის შეერთებულმა შტატებმა ხელი არ მოაწერა ერთობლივ განცხადებას, რომელიც 2008 წლის აგვისტოს ომში რუსეთის ქმედებებს გმობს. გაეროს უშიშროების საბჭოს მიერ მომზადებულ დოკუმენტს ხელს აწერენ მხოლოდ ევროკავშირის წევრი სახელმწიფოები და დიდი ბრიტანეთი.