საქართველოს პარლამენტის თავმჯდომარემ, ირაკლი კობახიძემ იუსტიციის უმაღლესი საბჭოს მდივანთან, გიორგი მიქაუტაძესთან შეხვედრის შემდეგ განაცხადა, რომ ჯერ უზენაესი სასამართლოს მოსამართლეების შერჩევის კრიტერიუმები გაიწერება და კანდიდატებს ამის მიხედვით წარადგენენ პარლამენტში.

ირაკლი კობახიძის განმარტებით, უზენაესი სასამართლოს მოსამართლეობის კანდიდატების შერჩევის კრიტერიუმებს ექნება უკუძალა და იმ 10-კაციან სიაზეც გავრცელდება, რომელიც პარლამენტში ახლაა წარდგენილი.

"იურიდიულად არსებული სიის გაწვევა არის შეუძლებელი, თუმცა კიდევ ერთხელ იქნება წარმოდგენილი ახალი სია და თითოეული კანდიდატი, რომელიც იქნება წარმოდგენილი დაექვემდებარება იმ პროცედურებს და კრიტერიუმებს, რომელსაც გავწერთ", — განაცხადა ირაკლი კობახიძემ.

მან ასევე თქვა, რომ კრიტერიუმებისა და პროცედურების გასაწერად საუკეთესო ფორმატი სასამართლო რეფორმის ჯგუფია, რომელიც ხელისუფლების სამივე შტოსა და მესამე სექტორის წარმომადგენლებითაა დაკომპლექტებული.

"ვფიქრობთ, რომ საუკეთესო ფორმატი ამისთვის არის სასამართლო რეფორმის სამუშაო ჯგუფი, რომელიც დიდი ხანია შექმნილი. აქ არიან წარმოდგენილი პარლამენტის წევრები, ხელისუფლების სამივე შტო, მთავრობა იუსტიციის სამინისტროს სახით, სასამართლო კორპუსი, იუსტიციის საბჭოს უკლებლივ ყველა წევრი, საერთაშორისო პარტნიორები, ექსპერტები და არასამთავრობო სექტორის წარმომადგენლები", — განაცხადა ირაკლი კობახიძემ.

ირაკლი კობახიძემ აღნიშნა, რომ სიის უკან გაწვევის მექანიზმი არ არსებობს. თუმცა, პარლამენტის თავმჯდომარე არ გამორიცხავს, რომ მოსამართლეთა იმ შემადგენლობამ, ვინც პარლამენტში დასამტკიცებლადაა წარდგენილი, უმრავლესობის წევრების მხარდაჭერა ვერ მოიპოვოს და სია ჩავარდეს.

საქართველოს პარლამენტის თავმჯდომარე, ირაკლი კობახიძე იუსტიციის უმაღლესი საბჭოს მდივანს, გიორგი მიქაუტაძე უზენაესის მოსამართლეობის კანდიდატების საკითხზე უკვე მეორედ შეხვდა.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.

10 იანვარს ქართული ოცნების თავმჯდომარემ, ბიძინა ივანიშვილმა განცხადება გაავრცელა, რომელშიც აღნიშნა, რომ ეკა ბესელია იურიდიულ საკითხთა კომიტეტის თავმჯდომარის თანამდებობიდან გადადგომის შემდეგ პარტიის და გუნდურობის პრინციპების წინააღმდეგ წავიდა.