დიდი ბრიტანეთის პარლამენტის წევრმა, ჯეიმს მაკლირიმ ევროსაბჭოს საპარლამენტო ასამბლეაში ქართული ოცნების დელეგაციისთვის უფლებამოსილების შეწყვეტის მხარდაჭერის მიზეზებზე TV პირველთან ინტერვიუში ისაუბრა.

მისი თქმით, ქართული ოცნება არ მიჰყვება ევროსაბჭოს სტანდარტებს და მათთვის უფლებამოსილების შეწყვეტა სრულიად ჯანსაღი მოთხოვნაა.

"წინა განცხადებიდან გამომდინარე, რომელიც ქართულ ოცნებას ავალდებულებდა გაეუმჯობესებინა მდგომარეობა დემოკრატიის პრინციპების დაცვით, რისთვისაც გარკვეული დროც ჰქონდა მიცემული, დავინახეთ, რომ ქართული ოცნების პარტიისგან აშკარა ნიშნები მოთხოვნების შესრულებისა ვერ ჩანდა. პირიქით, ვნახეთ უფრო შემაშფოთებელი მოქმედებები, რამაც მდგომარეობა გააუარესა. მათ შორისს, ოპოზიციის ლიდერების დაკავება. ეს არის ესკალაციის შემდეგი დონე, შენ არ შეასრულე რაც გთხოვეს და არ მიჰყვები ევროსაბჭოს სტანდარტებს, რომლის შესრულებაც წევრი სახელმწიფოსთვის სავალდებულოა. აქედან გამომდინარე, სრულიად ჯანსაღი მოთხოვნაა, რომ არ ცნონ ქართული ოცნების უფლებამოსილება, რათა ოცნების დელეგაციამ დასწრება ვეღარ შეძლოს. საქართველო არ არის პირველი ქვეყანა, რომელიც ამ მდგომარეობაში აღმოჩნდა. რუსეთი აღარ არის ევროსაბჭოს წევრი მსგავსი პროცესების შემდეგ და უკრაინაში მათი ქმედებებიდან გამომდინარე. ვფიქრობ, ძალიან სერიოზული საკითხია. უფრო ფართო ჭრილში, ეს აჩვენებს, რამდენი ევროპული ქვეყანაა შეშფოთებული საქართველოში განვითარებული პროცესებით.

ამიტომაც, წამოვჭერით საკითხი თემთა პალატაში სანქციების რეჟიმთან დაკავშირებით, კონკრეტულად ბიძინა ივანაშვილის და მასთან ასოცირებული პირების სანქცირებასთან დაკავშირებით.

მნიშვნელოვანი რეგრესი შეინიშნება იმ დემოკრატიული პრინციპებისადმი დამოკიდებულებაში, რომელთა დაცვასაც ველით საქართველოში. ამიტომ, რასაც ევროსაბჭოში ხედავთ არის უკმაყოფილების გამოხატვა იმისა, როგორც მოქმედებს მთავრობა. მათი ბოლოდროინდელი ქმედებები აბსოლუტურად შოკისმომგვრელი იყო. ჩვენ ვნახეთ ადამიანების ცემა ქუჩებში, თვითნებური დაკავებები, განაჩენი სათანადო იურიდიული პროცესების გარეშე გამოჰქონდათ, რაც აბსოლუტურად შოკისმომგვრელია, ამიტომ ძალიან მკაფიო მესიჯი უნდა გაეგზავნოს საქართველოს მთავრობას, რომ ეს მიუღებელია", — აცხადებს მაკლირი.

ცნობისთვის, მიმდინარე წლის 19 აგვისტოს "ევროსაბჭოს საპარლამენტო ასამბლეის (PACE) 51-მა დეპუტატმა (24 სხვადასხვა ქვეყნიდან, გაწევრიანებულები 4 სხვადასხვა პოლიტიკურ ჯგუფში) წერილობითი დეკლარაცია გაავრცელა — "ავტოკრატიული უკუსვლა საქართველოში". ისინი მინისტრთა კომიტეტს მიმართავენ, რომ საქართველოს ევროსაბჭოდან გასაძევებლად, "თუ საქართველო ავტორიტარული კურსის შეცვლის საკითხში პროგრესს არ მიაღწევს".

ასამბლეის წინა რეზოლუციაში, რომელიც 29 იანვრით თარიღდება, ევროპარლამენტარები ოცნების ხელისუფლებას მოუწოდებდნენ, დაენიშნათ ვადამდელი არჩევნები და პოლიტპატიმრები გაეთავისუფლებინათ.

რეზოლუციის მიღებიდან მალევე, ქართული დელეგაციის ხელმძღვანელმა, თეა წულუკიანმა განაცხადა, რომ ოცნების გუნდის გადაწყვეტილებით, საქართველო ევროსაბჭოს საპარლამენტო ასამბლეაში მუშაობას წყვეტს.