69 წლის ასაკში, ქართველი მუსიკოსი და კომპოზიტორი მამუკა ჩარკვიანი გარდაიცვალა. ინფორმაციას მისი ოჯახი და ახლობლები სოციალურ ქსელში ავრცელებენ.

მამუკა ჩარკვიანს ჯანმრთელობის პრობლემები დიდი ხნის განმავლობაში ჰქონდა, თუმცა ბოლო პერიოდში მისი მდგომარეობა განსაკუთრებით დამძიმდა, რის გამოც კლინიკაში იყო გადაყვანილი.

მუსიკოსს მიღებული აქვს სიმღერის ფესტივალ "ლიგას" პირველი პრემია — ნომინაცია ქართული ტრადიციული სიმღერა — სიმღერისთვის "მწვანე რტოები" (1996), XX საუკუნის საუკეთესო სიმღერის პრიზი სიმღერისთვის "მაღლა და მაღლა" (1999), ოქროს დისკი ნომინაცია — წლის საუკეთესო სიმღერა — სიმღერებისთვის: "ჩემი აღარა ხარ", "გაზაფხული", "აპრილი" და "დედის ჯერი".

მუსიკოსი 2000 წელს ღირსების ორდენით დაჯილდოვდა. 2014 წლის 10 მაისს, ფილარმონიის დიდი საკონცერტო დარბაზის წინ მამუკა ჩარკვიანის ვარსკვლავი გაიხსნა.

მამუკა ჩარკვიანმა 1972 წელს დაამთავრა თბილისის 61-ე საშუალო სკოლა. 1977 წელს დაასრულა თბილისის სახელმწიფო უნივერსიტეტის ფილოლოგიის ფაკულტეტი. მამუკა ჩარკვიანი 1977-79 წლებში მეტეხის თეატრის სამხატვრო ხელმძღვანელად მუშაობდა. 1979-82 წლებში იყო ახალგაზრდული ორგანიზაციის II მდივან და 1982-92 წლებში — გ. ლეონიძის სახელობის ლიტერატურის მუზეუმის დირექტორის მოადგილე. 1992 წელს კი პრეზიდენტის აპარატის მრჩეველ-კონსულტანტი.