ძველი აბანოების სახურავზე ჩატარებული სამუშაოების გამო მუნიციპალურმა ინსპექციამ გამოძიება დაიწყო. ამის შესახებ "რადიო თავისუფლება" წერს. მათივე ცნობით, კულტურული მემკვიდრეობის ძეგლთან დაკავშირებით თბილისის მერია პასუხისმგებლობას იხსნის. იქ აცხადებენ, რომ სამუშაოები მათთან შეთანხმებული არ ყოფილა.

9 აგვისტოს სოციალურ ქსელში „სამეფო აბანოს“ შავი სახურავის ფოტო გავრცელდა, რასაც საზოგადოების აღშფოთება მოჰყვა. წერდნენ, რომ ძეგლზე გუდრონი დაასხეს.

როგორც "რადიო თავისუფლებასთან" საუბრისას სამეფო აბანოს ადმინისტრატორმა სონია არუთინოვა აცხადებს, რომ ეს "გუდრონი არ არის, თბოიზოლაციაა". მისი თქმით, აბანოში წყალი ჩამოდიოდა და ამიტომ ერთი კვირის წინ სახურავის გარემონტება გადაწყვიტეს, ახლა კი მერიამ სამუშაოები შეაჩერა.

სამეფო აბანო აბანოთუბანში მდებარე გოგირდის აბანოებიდან ერთ-ერთია. ისტორიული ცნობებით, XIII საუკუნის თბილისში მინერალური წყლის 65 აბანო ყოფილა. თბილისის აბანოებზე ცნობებს გვაწვდიან XIII-XIV საუკუნეების ვენეციელი მოგზაური მარკო პოლო, XVIII საუკუნის რუსი ვაჭარი ვასილ გაგარა, ასევე ვახუშტი ბაგრატიონი, რომელიც თბილისში ექვს აბანოს ითვლის. დღემდე შემორჩენილ აბანოთა უმრავლესობა XVII–XVIII საუკუნეებში ირანული არქიტექტურის გავლენითაა შექმნილი