"ცინიზმია, როცა დაბომბილი ქალაქის საკრებულოს თავმჯდომარე აკეთებს მსგავს განცხადებას" — ასე ეხმაურება 2008 წლის ომის ვიცე-პოლკოვნიკი ია პაიჭაძე გორის საკრებულოს თავმჯდომარის განცხადებას, რომელმაც რუს ოკუპანტებს "მშვიდობისმყოფელები" უწოდა.

როგორც ია პაიჭაძე აღნიშნავს, "ეს არის ქვეყნის ინტერესების ღალატი და აბუჩად აგდება".

"ეს არის ქვეყნის ინტერესების ღალატი და აბუჩად აგდება. ეს არის "ქართული ოცნების" რუსული პოლიტიკის, რუსული კურსის კიდევ ერთხელ აშკარა გამოვლინება და მე ვფიქრობ, რომ ახლა დაიწყეს მადლობით, გააგრძელებენ სავარაუდოდ, ბოდიშით, როგორც განაცხადეს. გარდა ამისა, მე ვფიქრობ, რომ განსაკუთრებით ცინიზმია ის, რომ დაბომბილი ქალაქის საკრებულოს თავმჯდომარე აკეთებს მსგავს განცხადებას. როგორ არ უნდა გიყვარდეს საკუთარი ქვეყანა და ერი, რომ მადლობა გადაუხადო მათ, ვინც შენი სამშობლო დაბომბა და საკუთარი თანამოქალაქეები დაგიხოცა, ეს მე არ მესმის. რაც შეეხება იმას, რომ ოღონდაც წინა ხელისუფლებას რამენაირად ბრალი დასდონ რაღაცაში და მოსცხონ ლაქა, არ შეიძლება ქვეყნის ისტორიის გადაწერა," — აცხადებს ია პაიჭაძე "ტვ პირველთან".

გორის საკრებულოს თავმჯდომარე, დავით რაზმაძე NYT-ის ჟურნალისტს, სკოტ ანდერსონს ინფორმაციის გაყალბებაში ადანაშაულებს. ის "ტვ პირველთან" სატელეფონო საუბრისას ირწმუნება, რომ ის, რაც New York Times-ის ინტერვიუში წერია "თავიდან ბოლომდე ცილისწამება და სიცრუეა".