დე ფაქტო სამხრეთ ოსეთის პრეზიდენტი ანატოლი ბიბილოვი აცხადებს, რომ საქაართველოსთან ურთიერთობების აღდგენაზე საუბარი ზედმეტია მანამ, სანამ ოფიციალური თბილისი ბოდიშს არ მოიხდის. მისი თქმით, კიდევ ერთი აუცილებელი მოთხოვნა სამომავლო ურთიერთობების დასამყარებლად დე ფაქტო სახელმწიფოს დამოუკიდებლად აღიარებაა. ამის შესახებ მან ადგილობრივ სახელისუფლებო მედიასთან ისაუბრა.

ბიბილოვმა განმარტა, რომ საქართველომ ბოდიში ოსეთის მოქალაქეების წინაშე ჩადენილი დანაშაულის გამო უნდა მოიხადოს. მისივე თქმით, ბოლო პერიოდში ქართული მხარე ე.წ საზღვართან ძალიან გააქტიურდა, საქართველოს მოსახლეობა კი პროვოკაციებს აწყობს.

მას შემდეგ, რაც კონფლიქტისპირა სოფელ ატოცში საოკუპაციო ძალებმა ე.წ საზღვრის გავლება დაიწყეს სამოქალაქო აქტივისტებმა არაერთი აქცია გამართეს. ანტიოკუპაციური მოძრაობა ძალა ერთობაშიას წევრები კი ადგილზე პატრულირებენ.

რამდენიმე თვის წინ პოლიტიკურმა პარტია გირჩმა და მოძრაობა რუსეთი ოკუპანტიამ სოფელ ატოცში აქცია გამართა. გირჩის ლიდერის, ზურა ჯაფარიძის ინიციატივით აქტივისტებმა ე.წ საზღვარს მიღმა მყოფ პირებს უკანალი მიუშვირეს და ოკუპაცია ამ ფორმით გააპროტესტეს.