გერმანიის ქალაქი ზაარბრიუკენი თბილისთან ყველანაირ ოფიციალურ კავშირს აჩერებს. მიზეზად საქართველოში არსებული პოლიტიკური ვითარება სახელდება.

ადგილობრივი გამოცემა Saarbrücker Zeitung-ის ინფორმაციით, შესაბამისი რეზოლუციის პროექტი, რომელიც მოქმედი მერის, უვე კონრადტის (CDU) ოფისში მომზადდა, ზაარბრიუკენის საქალაქო საბჭოს განსახილველად მიმდინარე კვირის სამშაბათს წარედგინება. დოკუმენტი რეკომენდაციას უწევს საქართველოს დედაქალაქთან ყველანაირი ოფიციალური კონტაქტის შეჩერებას შემდგომ შეტყობინებამდე.

ორ ქალაქს შორის პარტნიორობა უკვე 50 წელზე მეტს ითვლის. ხელშეკრულებას ხელი ჯერ კიდევ საბჭოთა პერიოდში, 1975 წლის 22 მარტს მოეწერა ზაარბრიუკენის მომავალი მერის, ოსკარ ლაფონტენისა და მისი ქართველი კოლეგის, ბახვა ლობჟანიძის მიერ. ეს იყო ისტორიული, პირველი ოფიციალური "დაძმობილება" დასავლეთ გერმანიის ქალაქსა და საბჭოთა კავშირის შემადგენლობაში მყოფ ქალაქს შორის.

მიუხედავად ოფიციალური კავშირების გაწყვეტისა, ზაარბრიუკენის მერი უვე კონრადტი ხაზგასმით აღნიშნავს, რომ ეს გადაწყვეტილება არ შეეხებათ რიგით მოქალაქეებს და ქალაქი "არ შეაჩერებს სამოქალაქო საზოგადოების ურთიერთგაცვლის ხელშეწყობას".