სოფელ ატოცში ანტისაოკუპაციო აქციაზე მონაწილეებმა შარვლები ჩაიხადეს და ოკუპანტებს უკანალი აჩვენეს. იდეის ავტორი იყო გირჩის ლიდერი, ზურა ჯაფარიძე. მისი თქმით, მნიშვნელოვანია, რომ ატოცში მიმდინარე მოვლენები საერთაშორისო პრესის ყურადღება მიიქციოს. ჯაფარიძემ აქციის მონაწილეებს შესთავაზა, რომ ფილმ Brave Heart-ის მსგავსად რიგში განლაგდნენ, შარვლები ჩაიხადონ და რუს ოკუპანტებს საჯდომები ანახონ.

სოფელ ატოცში, საოკუპაციო ხაზთან საპროტესტო აქცია მიმდინარეობდა. აქციას პოლიტიკური პარტია გირჩმა, მოძრაობა რუსეთი ოკუპანტიამ და ანტიოკუპაციური მოძრაობა ძალა ერთობაშიამ გამართა.

საოკუპაციო ხაზის ორივე მხარეს მობილიზებული იყვნენ სამართალდამცავები და სამხედროები. ქართველი აქტივისტების პროტესტს საოკუპაციო რეჟიმის მხრიდან რუსული მედიაც აშუქებდა. ე.წ საზღვრის მიღმა მდებარე საოკუპაციო ძალების საგუშაგო კოშკთან მყოფი პირები აქ შეკრებილ ხალხს დურბინდებიდან აკვირდებოდნენ და ფოტოებს უღებდნენ.

ძალა ერთობაშიას ლიდერი დავით ქაცარავა On.ge-სთან აცხადებდა, რომ ატოცთან მათ 24-საათია პატრულირება აქვთ დანიშნული. აქციის მონაწილეები ამბობდნენ, რომ რუსეთის უკანონო ქმედებებს აპროტესტებენ.

საქართველოს მიერ კონტროლირებად ტერიტორიაზე, აქციისა და ადგილზე არსებული ვითარების მონიტორინგს აკეთებდნენ ევროკავშირის სადამკვირვებლო მისიის წევრები.

6 ნოემბერს ცნობილი გახდა, რომ ქარელის მუნიციპალიტეტის სოფელ ატოცის მიმდებარე ტერიტორიაზე მავთულხლართების უკანონო გაბმა მიმდინარეობს. სახელმწიფო უსაფრთხოების სამსახურის განცხადებით, აღნიშნულ ფაქტთან დაკავშირებით გააქტიურებულია ცხელი ხაზი და ინფორმირებულია ევროკავშირის სადამკვირვებლო მისია.

სოფელ ატოცში საოკუპაციო ხაზის გავლება 2008 წლის აგვისტოს ომის შემდეგ დაიწყო. 2014 წელს ე.წ საზღვრის გავლების შედეგად ადგილობრივებმა 30 ჰექტარი მიწა დაკარგეს.