ბრიუსელის სენ-ჟილის უბანში მდებარე ისტორიული შენობა — Aegidium ხაზარაძეების ოჯახმა შეისყიდა. ამის შესახებ ინფორმაციას ბელგიური გამოცემა La Dernière Heure ავრცელებს. გამოცემა წერს, რომ ახალი მფლობელები სივრცის კულტურულ გამოცოცხლებას გეგმავენ.

1906 წელს აშენებული Aegidium თავისი არქიტექტურითაა ცნობილი. თეატრი, კინოთეატრი და საზეიმო დარბაზი, ბოლო წლებში დაგეგმილი სხვადასხვა პროექტების მიუხედავად, წლებია დაკეტილია.

ხაზარაძეების ოჯახი, რომელმაც ახლახან გადაიბარა ქონება, აცხადებს, რომ მათი მიზანია პროექტის კულტურულ ჩარჩოში ინტეგრირება.

"Aegidium ისტორიითა და ემოციებით აღავსე ადგილია. ჩვენი მიზანია აღვადგინოთ ის ისე, რომ შევუნარჩუნოთ სული", — ამბობს მამუკა ხაზარაძე.

ახალი მფლობელები ასევე ხაზს უსვამენ ბრიუსელსა და საქართველოს შორის არსებულ ისტორიულ კავშირებს. პრესრელიზში აღნიშნულია, რომ ქართული ღონისძიებები ამ შენობაში ჯერ კიდევ მე-20 საუკუნის დასაწყისში იმართებოდა, როდესაც Aegidium ჯერ კიდევ Diamant Palace-ის სახელით იყო ცნობილი.

პროექტის დეტალები და მისი განხორციელების ვადები ჯერ კიდევ დასაზუსტებელია. პროექტის ავტორები აცხადებენ, რომ მათ თანამშრომლობა სურთ ბრიუსელის ხელისუფლებასთან, ისევე როგორც ადგილობრივ და ქართულ კულტურულ წრეებთან.

ბრიუსელში Aegidium-ის შესყიდვასთან დაკავშირებით განცხადება გაავრცელა ხაზარაძეების ფონდმაც. მათი განმარტებით, ევროპის პოლიტიკურ ცენტრში, ბრიუსელში, საქართველოს მუდმივმოქმედი საზოგადოებრივ-კულტურული სივრცე გაიხსნება.

ფონდი აღნიშნავს, რომ მათი მიზანია, ნაგებობას პირვანდელი, კულტურული ცენტრის დანიშნულება დაუბრუნდეს და ჩამოყალიბდეს "საქართველოს სახლი ევროპაში". მათი განმარტებით, ეს სივრცე ხელს შეუწყობს ქართველ და ევროპელ ხალხებს შორის საგანმანათლებლო, ეკონომიკურ და პოლიტიკურ კავშირებს, ამასთანავე, მოემსახურება ქართული დიასპორის ინტერესებს.

არქიტექტურული კომპლექსის რეკონსტრუქცია უახლოეს პერიოდში დაიწყება. პროექტის ფარგლებში შენობას პირვანდელი სახე დაუბრუნდება და იქ მოეწყობა დარბაზები კულტურული ღონისძიებებისა თუ მაღალი დონის შეხვედრებისთვის.

ფონდში მიიჩნევენ, რომ პროექტს განსაკუთრებული დატვირთვა აქვს მიმდინარე პოლიტიკური გამოწვევების ფონზე.

"აეგიდიუმი" იქცევა სივრცედ, რომელიც მჭიდოდ დააკავშირებს საქართველოს ევროპასთან — მის ისტორიულ ოჯახთან. აქ თავს მოიყრის საქართველო, მთელი თავისი მემკვიდრეობით, ეროვნული ტრადიციებით, ისტორიით, კულტურითა და პოლიფონიური მრავალფეროვნებით. "აეგიდიუმი" იქნება ყოველივე ქართულის და ყველა ქართველის შეხვედრის ადგილი ევროპის გულში", — განაცხადა მამუკა ხაზარაძემ.