"თუ ევროპული ბიუროკრატია დაძლევს საკუთარ კომპლექსებს, ამ შემთხვევაში ძალიან მარტივად გადაიტვირთება ურთიერთობები საქართველოსა და ევროკავშირს შორის", — ამის შესახებ ირაკლი კობახიძემ ბრიფინგზე განაცხადა. მისი განმარტებით, ურთიერთობების გადატვირთვის კუთხით ჩვენი ხელი გაწვდილია და მათი "კომპლექსებისგან გათავისუფლებას" ელიან.

"ევროპული ბიუროკრატია არის საკუთარი უსამართლობის მძევალი. ვერ გამოდიან ამ წრიდან. თვითონვე შექმნეს ეს უსამართლობის წრე. თვითონვე ჩაიკეტეს თავი ამ უსამართლობის წრეში და ახლა აქედან ვეღარ გამოდიან. რეალურად მათ უნდა დაძლიონ კომპლექსები. ის კომპლექსები, რომლებიც, თვითონვე შექმნეს საკუთარი უსამართლობის საფუძველზე. თუ ევროპული ბიუროკრატია დაძლევს საკუთარ კომპლექსებს, ამ შემთხვევაში ძალიან მარტივად გადაიტვირთება ურთიერთობები საქართველოსა და ევროკავშირს შორის. ამ კუთხით, ელი არის გაწვდილი. დაველოდებით მათი კომპლექსებისგან გათავისუფლებას", — განაცხადა ირაკლი კობახიძემ.

შეგახსენებთ, ბრიფინგზე ირაკლი კობახიძემ ღია წერილი წაიკითხა, რომლითაც ის ევროკომისიის პრეზიდენტს, ურსულა ფონ დერ ლაიენს, ევროსაბჭოს პრეზიდენტს, ანტონიო კოშტას და ევროპარლამენტის თავმჯდომარეს, რობერტა მეცოლას მიმართავს.

წერილში ქართული ოცნება ევროპას დემოკრატიის და ადამიანის უფლებების შელახვაში ადანაშაულებს. მათი განცხადებით, "ევროპა შესაძლოა იქცეს არა ამ ღირებულებების დაცვის, არამედ მათი უგულებელყოფისა და უხეში დარღვევის ეტალონად".