შინაგან საქმეთა სამინისტროს განცხადებით, 1973 წელს დაბადებული პირი ექვსი სახლის ქურდობისა და ქურდობის მცდელობის ბრალდებით, სიღნაღის მუნიციპალიტეტში დააკავეს.

შსს-ს მტკიცებით, სამართალდამცველებმა ბრალდებული იმ დროს დააკავეს, როდესაც იგი სიღნაღის მუნიციპალიტეტის სოფელ ილიაწმინდაში ერთ-ერთი მოქალაქის საცხოვრებელ სახლს ქურდავდა.

უწყების ცნობით, დაკავებულმა აღიარა, რომ მიმდინარე წელს მან სიღნაღის რაიონში კიდევ ხუთი საცხოვრებელი სახლი გაქურდა.

შსს-ს ინფორმაციით, ნაქურდალ ნივთებს შორის იყო ორი სანადირო თოფი.

გამოძიება ქურდობის და ქურდობის მცდელობის ფაქტებზე, საქართველოს სსკ-ს 177-ე მუხლის მე-3 ნაწილის გ ქვეპუნქტის და 19-177-ე მუხლის მე-2 ნაწილის ბ ქვეპუნქტებით მიმდინარეობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.