"საქართველოც ამერიკული ქვეყანაა, რუსეთი დამარცხდა, ანუ ამერიკა ამარცხებს მას", — ამის შესახებ პატრიოტთა ალიანსის ერთ-ერთმა ლიდერმა დავით თარხან მოურავმა გადაცემა "სტუდია N8-ში" საუბრისას განაცხადა.

მისი განცხადებით, რუსეთი დასავლეთისა და ამერიკის შეერთებული შტატების მიერ ყველა მიმართულებით არის შევიწროებული და დამარცხებული, საქართველო კი რეალურად ამერიკული გავლენის ქვეყანაა, რაც ქვეყნის საგარეო პოლიტიკის დაგეგმვისას აუცილებლად გასათვალისწინებელია. თარხან-მოურავმა ხაზი გაუსვა, რომ აშშ-მა რუსეთს პოზიციები ბევრ რეგიონში, მათ შორის მეზობელ სომხეთშიც შეუსუსტა, სადაც მოსახლეობა და ბიზნესი სრულად რუსეთზეა დამოკიდებული.

"არსებობს კავშირი რუსეთი-ბელორუსი-ყაზახეთი-სომხეთი. ამ კავშირს აქვს ფულადი ბრუნვა და ამ მთელი ფულადი ბრუნვის 0.18% საჩუქრად მიდის სომხეთთან. ეს უზარმაზარი თანხაა, დღესაც სომხეთი ამ ფულით ცხოვრობს. სომეხი ბიზნესმენების 90%-ის ბიზნესი რუსეთს უკავშირდება. დღეში 5, 6, 7 რეისია ყოველდღე თვითმფრინავის მარტო ერევანი-მოსკოვი, აი, რომ დააკვირდეთ, როგორი ინტენსივობაა.

სომხები მთლიანად რუსეთზე არიან დამოკიდებული თავისი ბიზნესითაც და ყველაფრით. და აი, ამ პირობებში ბუნებრივია, რომ პრორუსული განწყობები აბსოლუტური უმრავლესობაა სომხეთში და ამ დროს ეს განწყობები მარცხდება და პროამერიკული ფაშინიანი იმარჯვებს, ვითომ იმარჯვებს. რაზე მეტყველებს ეს? იმაზე, რომ ამერიკა ართმევს რუსეთს სომხეთს, აი, ამაზე. იმაზე, რომ რუსეთი ამერიკამ და დასავლეთმა ყველა მხრიდან შეავიწროვა. გინდა ირანი, სადაც გავლენა აქვს დიდი რუსეთს, ირანი დამარცხებულია... გინდა სომხეთი, რომელსაც ახლა ართმევს.

ამიტომ ვამბობ, საქართველოც ამერიკული ქვეყანაა, გავიგოთ ეს ჩვენ, რომ რუსეთი დამარცხდა, ანუ ამერიკა ამარცხებს მას. დაამარცხა ვენესუელაში, ლიბიაში, სირიაში, ირანში, სომხეთში, საქართველოში, აზერბაიჯანში და გამოჩნდა კვლავ, რომ ამერიკა არის ყველაზე ძლიერი სახელმწიფო მსოფლიოში. ეკონომიკის ერთი მესამედი მსოფლიოსი ამერიკაა, ამერიკას და ევროპას ეკონომიკის 56% მაინც ეკუთვნის მთელი მსოფლიოსი და ამერიკას მარტო ძალუძს, აი, ამდენი რამ გააკეთოს.

ეს უნდა დავინახოთ ჩვენ და რატომაა მნიშვნელოვანი ეს ანალიზი: რომ ჩვენი მომავალი, საქართველოდი... გონივრულობა უნდა გამოვიჩინოთ. ჩვენი ურთიერთობა რუსეთთან, ჩვენი ურთიერთობა ამერიკასთან, ევროპასთან, თურქეთთან, ირანთან თუ ჩინეთთან, უნდა ავაგოთ ამის გათვალისწინებით, რომ ჩვენ არ დავმარცხდეთ. რომ ჩვენი ინტერესი დავიცვათ ყველგან. ამიტომ, აი, ასეთი ლანძღვა-გინება, ჭიდაობა და ფურთხება ამერიკის, არაფერს არ იძლევა, ეს კატასტროფამდე მიგვიყვანს ჩვენ. ეს უნდა გავაანალიზოთ", — განახხადა თარხან-მოურავმა.

პატრიოტთა ალიანსის ლიდერმა გადაცემაში ასევე აღნიშნა, რომ საქართველოში დასავლური პარტნიორების გავლენა და ფინანსური თუ ინსტიტუციური მხარდაჭერა აშკარაა და ამ რეალობის უარყოფა თავის მოტყუება იქნებოდა.

"ჩვენ უნდა გავაცნობიეროთ კიდევ ერთხელ, რომ საქართველო ამერიკული ქვეყანაა სინამდვილეში. საუბარი იმაზე, რომ არ არის ამერიკული ქვეყანა — თავის მოტყუებაა. ყველა სახელმწიფო უწყებაში ზის ამერიკის შეერთებული შტატების წარმომადგენელი, აბსოლუტურად ყველა სახელმწიფო უწყებაში. ამერიკა დღესაც ეხმარება საქართველოს, არა მარტო ამერიკა — ამერიკაც, ევროპაც, ფულითაც, უამრავი სხვა ბერკეტებით", — თქვა დავით თარხან-მოურავმა.