მსოფლიოს პატრიარქი ბართლომე I რუსეთის მიერ კიევ-პეჩერის ლავრის დაბომბვას ბარბაროსულად აფასებს და შეშფოთებას გამოხატავს.

"მსოფლიო საპატრიარქომ ღრმა მწუხარებითა და იმედგაცრუებით მიიღო ინფორმაცია რუსეთის ფედერაციის მიერ ისტორიულ კიევ-პეჩერის ლავრაზე განხორციელებული მიუღებელი და მკრეხელური სარაკეტო თავდასხმის შესახებ. იგი გმობს ამ თავდასხმას, ისევე როგორც დაგმობდა ნებისმიერ მსგავს თავდასხმას ქრისტიანობის საერთო რელიგიური და კულტურული მემკვიდრეობის წმინდა და სიმბოლური მნიშვნელობის ძეგლებზე.

ვერც ერთი გონიერი ადამიანი და ვერც ერთი არგუმენტი ვერ გაამართლებს ამ ბარბაროსულ და გამანადგურებელ თავდასხმას ისეთ წმინდა მომლოცველობით ცენტრზე, როგორიცაა სახელგანთქმული კიევის ლავრა — მრავალსაუკუნოვანი ისტორიისა და ტრადიციის მქონე ძეგლი, რომელიც იუნესკოს მსოფლიო მემკვიდრეობის ნუსხაშია შეტანილი.

მისმა ყოვლადუწმინდესობამ, მსოფლიო პატრიარქმა ბართლომეოსმა, პირადად ტელეფონით ისაუბრა კიევისა და სრულიად უკრაინის უნეტარეს მიტროპოლიტ ეპიფანესთან. მან გამოხატა თავისი აღშფოთება რუსეთის თავდასხმის გამო, ასევე დედაეკლესიისა და პირადად საკუთარი სრული მხარდაჭერა მრავალტანჯული უკრაინელი ხალხის მიმართ. პატრიარქმა თანაგრძნობა გამოუცხადა თავდასხმის შედეგად დაღუპულთა ოჯახის წევრებსა და დაშავებულებს," — ვკითხულობთ განცხადებაში.

საპატრიარქოს ინფორმაციით, თავდასხმის შემდეგ მსოფლიო პატრიარქი ტელეფონით ვოლოდიმირ ზელენსკის და კიევისა და სრულიად უკრაინის მიტროპოლიტ ეპიფანეს ესაუბრა.

შეგახსენებთ, 15 ივნისის ღამეს რუსეთმა კიევზე ბალისტიკური რაკეტებით მორიგი იერიში მიიტანა, რის შედეგადაც, უკრაინის ერთ-ერთი უმნიშვნელოვანესი რელიგიური და კულტურული ძეგლი, კიევ-პეჩერის ლავრის ტერიტორიაზე მდებარე ისტორიული მიძინების ტაძარი დაზიანდა.

რუსული თავდასხმის შედეგად კიევში რამდენიმე მრავალსართულიანი საცხოვრებელი კორპუსიც დაზიანდა. დედაქალაქში სულ მცირე ოთხი ადამიანი დაიღუპა და 30 დაშავდა, მათ შორის ორსული ქალი და ორი ბავშვი (5 და 6 წლის).