პოლიტოლოგი გია ხუხაშვილ IPN-თან გამოეხმაურა პარლამენტის საგარეო ურთიერთობათა კომიტეტის თავმჯდომარის, ნიკოლოზ სამხარაძის განცხადებას იმის თაობაზე, რომ "ქართულმა მხარემ ლუქსემბურგს სთხოვა, ევროკომისიასთან საქართველოსთან დიალოგის განახლების შესახებ საკითხი დააყენოს და მზად არიან კრიტიკულ საკითხებზე სასაუბროდ, მათ შორის გამჭვირვალობის კანონთან დაკავშირებით":

"პრობლემა იმაშია, რომ პაპუაშვილი კახელია და სამხარაძე იმერელი. ის კახურად პირდაპირ საუბრობს, რასაც ფიქრობენ ქართულ ოცნებაში და ეს იმერულად "ახვევს", "ტრიუკებს" ატარებს, რომ ვითომ მზად არიან მოლაპარაკებებისთვის. ქვეყანა, რომელსაც დემოკრატია უნდა, ასეთ კანონებს არ მიიღებდა. თუ ეს კანონი ვაჭრობისთვის მიიღეს, ეს კიდევ უფრო უარესი უბედურებაა, თუ ასეთ ენაზე უნდათ პარტნიორებთან და მეგობრებთან საუბარი.

ერთი კახურ "სლენგზე" გამოთქვამს საკუთარ პოლიტიკურ მოსაზრებებს, მეორე იმერულად. რა თქმა უნდა, ყველაფერი სავაჭროდ აქვთ პოლიტპატიმრებიდან დაწყებული კანონებით დამთავრებული.

სავაჭროდ სჭირდებათ იმისთვის, რომ მცირე კოსმეტიკური დათმობების სანაცვლოდ, ძირითად ფუნდამენტურ პრობლემებზე, რაც უკავშირდება ხისტ ავტორიტარიზმს, ბრიუსელმა თუ ამერიკამ თვალი დაუხუჭოს. სხვა საკითხია, რომ სხვადასხვა ტაქტიკას ირჩევენ და ესეც აბნევს საზოგადოებას, ათასი შეთქმულების თეორიები იწყება, რომ აი, რა ხდება, სამხარაძე ერთს ამბობს და პაპუაშვილი მეორეს.

სინამდვილეში, არც სამხარაძე აყალიბებს პოლიტიკას და არც პაპუაშვილი. ერთი კაცი თავისი პაიკებით თამაშობს, ერთმანეთისგან განსხვავებულად ასაუბრებს და შემდეგ მაქსიმალურად ამღვრევს წყალს, ცდილობს ამ ამღვრეულ წყალში თევზი დაიჭიროს“,- განაცხადა გია ხუხაშვილმა (IPN).

შეგახსენებთ, რომ გუშინ ლუქსემბურგში მყოფმა პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა, რომ შედგა შეხვედრები ლუქსემბურგის პარლამენტის საგარეო და თავდაცვის კომიტეტის თავმჯდომარესთან, კომიტეტის წევრებთან, ასევე საგარეო საქმეთა სამინისტროში, სადაც ქართულმა მხარემ სთხოვა ლუქსემბურგს, რომ ევროკომისიასთან დააყენოს საკითხი საქართველოსთან დიალოგის განახლების შესახებ. მისივე თქმით, საგარეო საქმეთა სამინისტროში "ლუქსემბურგის მხარეს სთხოვეს მხარდაჭერა, რომ საქართველოსთან დიალოგი განახლდეს და მზად არიან კრიტიკულ საკითხებზე სასაუბროდ, "მათ შორის "გამჭვირვალობის კანონთან" დაკავშირებით, რომელიც იყო კიდევაც ფორმალური მიზეზი ევროკავშირსა და საქართველოს შორის დიალოგის შეჩერების".