თუ გახსოვთ, როგორც კი HBO-მ ჰარი პოტერის სერიალი ოფიციალურად დააანონსა, მაშინვე გაგიზიარეთ იმ პერსონაჟების სია, რომლებიც ფილმებში გამოტოვეს, მაგრამ ძალიან გვინდოდა, რომ ახალ ადაპტაციაში გვეხილა. ჩამონათვალში საპატიო პირველ ადგილს იკავებდა პოლტერგეისტი პივსი — ჰოგვორტსის დერეფნებში მოხეტიალე აჩრდილი, რომელიც არცთუ კეთილი ხუმრობებით და აურზაურის მოწყობით გამოირჩევა. სიხარულით შეგვიძლია გითხრათ, რომ ჩვენი იმედი გამართლდა — პივსს პოტერიადის სერიალში ვიხილავთ.

ონავარ ავსულს ჯადოსნური სამყაროს ახალ ეკრანიზაციაში ბრიტანელი კომიკოსი პიტერ სერაფინოვიჩი შეასრულებს. სერაფინოვიჩს მაყურებელი ისეთი პროექტებიდან იცნობს, როგორებიცაა How to Train Your Dragon, Parks and Recreation და Guardians of the Galaxy. მსახიობმა ასევე გაახმოვანა დართ მოლი ვარსკვლავური ომების პრიკველი ტრილოგიის პირველ ნაწილში The Phantom Menace.

ბრიტანელი კომიკოსი პიტერ სერაფინოვიჩი

ფოტო: Karwai Tang / WireImage

აღსანიშნავია, რომ პივსის პერსონაჟი ჰარი პოტერის პირველი წიგნის კინოეკრანიზაციაში უნდა გამოჩენილიყო — მისმა შემსრულებელმა მსახიობმა რიკ მეიოლმა გადაღებებშიც მიიღო მონაწილეობა, მაგრამ, საბოლოოდ, ეს სცენები ფილმიდან ამოიჭრა. რეჟისორმა კრის კოლამბუსმა მოგვიანებით აღიარა, რომ პივსის ამოჭრა ფილმზე მუშაობისას დაშვებული ერთ-ერთი უდიდესი შეცდომა იყო.

ჰარი პოტერის სერიალის ხანგრძლივი მოლოდინი კი რამდენიმე თვეში დასრულდება. პირველი სეზონის პრემიერა შობა დღეს შედგება.

ჰარი პოტერი HBO-ის ერთ-ერთი ყველაზე მასშტაბური პროექტია, რომელიც, როგორც ცნობილია, მთელ ათწლეულს გასტანს. ამასთან, ჯოან როულინგის წიგნების მორიგი ეკრანიზაციის ბიუჯეტი ისეთ გიგანტებს გაუტოლდება, როგორებიცაა Game of Thrones და House of the Dragon. ცნობილია ისიც, რომ სერიის ყოველი წიგნის ეკრანიზაციას სერიალის თითო სეზონი დაეთმობა. პროექტში აქტიურადაა ჩართული თავად როულინგიც, რომელიც სერიალის აღმასრულებელი პროდიუსერი გახლავთ. მწერლის თქმით, "შედეგით კმაყოფილია".

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…