ვინ-ვინ და თანამედროვე კინოინდუსტრიის თავგამოდებული კრიტიკოსი თუ ყველაზე საკამათო ახალი ტექნოლოგიის მხარდამჭერი იქნებოდა, ვერ ვიფიქრებდით. როგორც ცნობილი გახდა, მარტინ სკორსეზე ხელოვნური ინტელექტის (AI) კომპანიას კონსულტაციას უწევს "შემოქმედებითობის საზღვრების გასაფართოებლად და მაყურებლისთვის უფრო მრავალფეროვანი გამოცდილების შესათავაზებლად". ამასთან, ოსკაროსანი რეჟისორი აღიარებს, რომ კომპანიის გენერაციულ ტექნოლოგიას თავადაც იყენებს სცენის ვიზუალური ორგანიზების ("სთორიბორდის") შესაქმნელად.

"კინო ახალი მედიუმია, დაახლოებით, 125 წელს ითვლის მხოლოდ, ასე რომ, ღია უნდა ვიყოთ მისი განვითარების შესაძლებლობების მიმართ", — აცხადებს სკორსეზე, — "Hugo-ის გადაღებისას, 3D ტექნოლოგია გამოვიყენე, The Irishman-ში კი — გაახალგაზრდავების ეფექტი. ახლა, ამ ხელსაწყოს საშუალებით, ჩემს გუნდს შემიძლია უფრო მკაფიოდ გავუზიარო ჩემი ხედვა. [...] როცა ასეთი ინსტრუმენტი გაქვს, ყველაფერი უფრო სწრაფად გამოგივა და ფილმზე მუშაობის დროს დაზოგავ".

AI კომპანია, რომელთანაც სკორსეზე თანამშრომლობს, Black Forest Labs გახლავთ. მისი აღმასრულებელი დირექტორის, რობინ რომბახის თქმით, ოსკაროსან რეჟისორთან პარტნიორობა მოწმობს, რომ "ეს საქმე გამოდის".

სკორსეზეს გარდა, კიდევ რამდენიმე ცნობილ რეჟისორს ჰგონია, რომ "ეს საქმე გამოდის". მათ შორისაა ავატარის შემქმნელი ჯეიმს კამერონი და ბეჭდების მბრძანებლის რეჟისორი პიტერ ჯექსონი, რომელიც AI-ს სპეცეფექტებს ადარებს.

თუმცა, არსებობენ ისეთი ხელოვანებიც, რომლებიც გენერაციული ხელოვნური ინტელექტისადმი მკვეთრად უარყოფით დამოკიდებულებას არ მალავენ. "შევე*ი ხელოვნურ ინტელექტს", — განაცხადა ლეგენდარულმა გილერმო დელ ტორომ კანის წლევანდელ კინოფესტივალზე. მირჩევნია მოვკვდე, ვიდრე AI გამოვიყენოო, აღნიშნა მექსიკელმა რეჟისორმა შარშან.

83 წლის მარტინ სკორსეზე კი წლების განმავლობაში არ ერიდებოდა თავისი კოლეგების ნამუშევრების კრიტიკას. 2019 წელს მან განაცხადა, რომ "კინოთეატრებში მარველის ფილმები არ უნდა გადიოდეს", რადგან ეს ფილმები "კინო არაა". მოგვიანებით მან აღნიშნა, რომ ჩვენს დროში "კინო ღირსებასა და ღირებულებას მოკლებულია, დაკნინებულია ყველა მხრივ, განსაკუთრებით კი მხატვრულობით". კინოხელოვნებაზე ზრუნვას დღევანდელ კინოინდუსტრიას ვერ მივანდობთო, თქვა სკორსეზემ 2021 წელსაც.