ჯორჯიან უოთერ ენდ ფაუერი ისნის რაიონში ლობჟანიძის ქუჩაზე წყალმომარაგების ქსელის სისტემური გაუმჯობესების მიზნით სარეაბილიტაციო სამუშაოებს ატარებს.

რეაბილიტაციის ფარგლებში ახლით იცვლება 1 კილომეტრზე მეტი სიგრძის მოძველებული წყალსადენის მაგისტრალური და გამანაწილებელი ქსელები, ხოლო წყალარინების ქსელის 1.5 კილომეტრზე მეტი სიგრძის მონაკვეთი, რაც ხშირად იწვევდა ქსელზე დაზიანებებსა და წყალმომარაგების შეზღუდვას. განახლებულ წყალსადენის ქსელზე ეწყობა 19 საკვანძო ჭა და 2 სახანძრო ჰიდრანტი, ხოლო წყალარინების ქსელზე 42 წყალარინების ჭა.

რეაბილიტაციის მიმდინარე სამუშაოებს ადგილზე გაეცნენ კომპანია ჯორჯიან უოთერ ენდ ფაუერის ტექნიკური დირექტორი, გიგა ნადირაძე და ისნის რაიონის გამგებელი, აკაკი ხლაბუსტოვი.

სარეაბილიტაციო პროექტი, რომელშიც კომპანიამ 2 მლნ ლარზე მეტი ინვესტიცია განახორციელა, მაისის თვეში დაიწყო და მასშტაბურობიდან გამომდინარე სრულად სექტემბერში დასრულდება.

აღნიშნული პროექტის განხორციელების შედეგად, ისნის რაიონში ლობჟანიძისა და მისი მიმდებარე ქუჩების მოსახლეობის მომსახურების ხარისხი მნიშვნელოვნად გაუმჯობესდება.

წყალმომარაგებისა და წყალარინების ინფრასტრუქტურის განახლება და განვითარება ჯივიპის ერთ-ერთი პრიორიტეტული მიმართულებაა. სარეაბილიტაციო სამუშაოებს კომპანია ყოველწლიურად, გეგმის მიხედვით, აქტიურად რეჟიმში განახორციელებს.