მსოფლიოს მრავალ ქალაქში გასტრო კვირეულები დიდი ხანია ტურისტული კალენდრის მნიშვნელოვან ნაწილად იქცა. დღეს, როცა ავთენტური შეგრძნებების მაძიებელი ვიზიტორისთვის გასტრონომიული გამოცდილება ერთ-ერთი უმნიშვნელოვანესი ფაქტორია, მსგავსი ღონისძიებები აღარ არის მხოლოდ ვირტუოზი შეფების კულინარიული დღესასწაულების ერთობლიობა. ეს არის საშუალება იმისა, რომ ქალაქებმა და ქვეყნებმა თავიანთი ტრადიციები და თანამედროვე ხედვები სტუმრებს არამატერიალური კულტურული მემკვიდრეობით — ადგილობრივი სამზარეულოთიც გააცნონ.

ამ იდეას ემსახურება Tbilisi Gastro Week, რომელიც უკვე მეხუთე წელია იმართება. ფესტივალი წელს 31 მაისიდან 7 ივნისის ჩათვლით თბილისსა და კახეთის რეგიონში ჩატარდა. საიუბილეო Tbilisi Gastro Week ამჯერადაც სტუდიო ლიბერთის სტრატეგიული პარტნიორობით გაიმართა და განსაკუთრებული მასშტაბის მოვლენად იქცა. კვირეულის ფარგლებში საქართველომ Michelin-ის ვარსკვლავის მფლობელ შეფმზარეულებს, მსოფლიო კლასის სომელიეებს, გასტრონომიის ექსპერტებსა და საერთაშორისო მედიის წარმომადგენლებს უმასპინძლა.

Tbilisi Gastro Week 2026-ის პროგრამა გასტრონომიასთან ერთად ფოკუსირდა ღვინის კულტურასა და მდგრადი ტურიზმის მიმართულებაზე. განსაკუთრებულ აღნიშვნას იმსახურებს ის ფაქტი, რომ საქართველოს ესტუმრა პარიზის ლეგენდარული Ritz Paris-ის სომელიერიის დირექტორი, ფლორიან გიოტო, რომელიც ქართველ სომელიესთან, ანა გოდაბრელიძესთან ერთად ღვინის დეგუსტაციებსა და სპეციალურ ვახშმებს გაუძღვა.

კვირეულის პროგრამა წელს გამორჩეულად დატვირთული იყო და მოიცავდა გახსნისა და დახურვის გალა ვახშმებს, საერთაშორისო Four Hands Dinner-ს, სადაც ქართველი და უცხოელი შეფები ექსკლუზიური მენიუებით შექმნილ კოლაბორაციებს წარადგენდნენ, კახეთის გასტრონომიულ ტურსა და თბილისის მდგრადი განვითარების რეგიონულ ფორუმს.

Tbilisi Gastro Week-ის საერთაშორისო მნიშვნელობასა და პრესტიჟს უდაოდ უსვამს ხაზს შეფების წლევანდელი ვარსკვლავური შემადგენლობა.

ფესტივალის ერთ-ერთი მთავარი სტუმარი გახლდათ ფრანგული კულინარიის ლეგენდა, Michelin-ის სამი ვარსკვლავის მფლობელი ჟაკ პურსელი, რომელმაც აგრეთვე Michelin-ის ვარსკვლავოსან შეფ სტეფან გორტინასთან ერთად ექსკლუზიური ვახშამი გამართა. გასტრონომიული კვირეული კი დაიხურა ბრანჩით, რომლისთვისაც ფლორენციიდან სპეციალურად ჩამოფრინდა ლეგენდარული მასიმო ბოტურას რესტორნის Gucci Osteria-ს შეფი, ასევე Michelin-ის ვარსკვლავის მფლობელი ტაკაჰიდო კონდო.

8 დღის განმავლობაში თბილისი და კახეთი გლობალური მნიშვნელობის გასტრონომიულ პლატფორმად იქცა. სტუდიო ლიბერთისთან ერთად Tbilisi Gastro Week წლებია ქმნის სივრცეს ქართული გასტრონომიის, როგორც კულტურული მემკვიდრეობის, ისე მდგრადი ტურისტული პოტენციალის საერთაშორისო აუდიტორიასთან დასაახლოებლად. გასტრონომია და მოგზაურობა ადამიანებისა და კულტურების შეხვედრას, შთაბეჭდილებებისა და იდეების გაზიარებას უწყობს ხელს. სწორედ ხარისხიანი გამოცდილებების შექმნის იდეა გახდა Studio Liberty-სა და Tbilisi Gastro Week-ს პარტნიორობის საფუძველი.