თბილისის სახელმწიფო უნივერსიტეტში არ განმარტავენ სტუდენტები ქულების მისაღებად რას წერდნენ და როგორ ზემოქმედებდნენ ლექტორებზე. უნივერსიტეტის ვებგვერდზე სტუდენტების მხრიდან ლექტორებზე შეფასების მისაღებად სოციალური ქსელებითა და სხვა გზებით ზეგავლენის მოხდენაზე განცხადება 26 იანვარს გავრცელდა.

On.ge-მ უნივერსიტეტის პრესსამსახურს სტუდენტების მხრიდან ლექტორებზე ზეგავლენის მოხდენის შესახებ 5 კითხვით მიმართა. პრესსამსახურის თანამშრომელმა, შეთანხმების მიუხედავად, არცერთ კითხვას უპასუხა.

On.ge-ს აინტერესებდა:

  1. რა ტიპის შეტყობინებებს წერდნენ [სტუდენტები ლექტორებს] (მუქარა, თხოვნა, შანტაჟი)?
  2. რატომ გახდა საჭირო განცხადების გავრცელება [რატომ არ მოხდა რეაგირება]?
  3. ამ დრომდე [თუ დაფიქსირდა მსგავსი შემთხვევა] თუ მომხდარა რაიმე ტიპის რეაგირება და რა სახის?
  4. დაიწყეთ თუ არა შესწავლა მსგავს შეტყობინებებს ჰქონდა თუ არა გავლენა ამ დრომდე შეფასებებზე?
  5. მსგავსი პრობლემა დაფიქსირდა თუ არა [იურიდიული ფაკულტეტის გარდა] სხვა მიმართულებებზეც?

უნივერსიტეტის პასუხი

"თბილისის სახელმწიფო უნივერსიტეტის იურიდიულ ფაკულტეტზე დაფიქსირდა რამდენიმე შემთხვევა, როცა პროფესორ-მასწავლებლებს პირად მისამართებზე მისდიოდათ გარკვეული შეტყობინებები. ფაკულტეტის ზოგიერთი პროფესორის მიერ ეს აღქმული იყო როგორც ზეწოლის მცდელობა, რაც ეწინააღმდეგება თსუ-ს შიდა განაწესს. შესაბამისად, ფაკულტეტის საბჭომ მიიღო გადაწყვეტილება შეიქმნას სპეციალური ჯგუფი, რომელიც შეისწავლის კონკრეტულ შემთხვევებს. მოკვლევის შედეგი ეცნობება ეთიკის კომისიას".

უნივერსიტეტში მიიჩნევენ, რომ "ეს კომენტარიც პასუხია", ჩვენს კითხვებს კი მოკვლევის დასრულების შემდეგ უპასუხებენ.