ადამიანის უფლებათა ცენტრის ინფორმაციით, გორის საქალაქო სასამართლომ სამი პოლიციელი მოქალაქის მიმართ ძალადობაში დამნაშავედ სცნო. ამავე გადაწყვეტილებით პოლიციელებს (თითოეულს ცალ-ცალკე) მოქალაქის მიმართ 2 ათასლარიანი ჯარიმის გადახდა დაეკისრათ.

ორგანიზაციის ინფორმაციით, 2015 წლის 4 აპრილს პოლიციის თანამშრომლებმა მოქალაქე თავისი სახლის მიმდებარე ტერიტორიიდან იძულებით ჩასვეს ავტომობილში და სასაფლაოს მიმართულებით წაიყვანეს, სადაც ფიზიკურად გაუსწორდნენ.

"ძალადობრივი ფაქტიდან ერთი თვის შემდგომ, შიდა ქართლისა და მცხეთა-მთიანეთის საოლქო პროკურატურამ მოქალაქე სცნო დაზარალებულად, მაგრამ სისხლის სამართლებრივი დევნა პოლიციის იმ თანამშრომლების მიმართ, რომლებმაც ფიზიკურად იძალადეს, ერთი წლის მანძილზე ჭიანურდებოდა", - ამბობენ ადამიანის უფლებათა ცენტრში.

ადამიანის უფლებათა ცენტრი მიიჩნევს, რომ საგამოძიებო ორგანოები მართლმსაჯულებას უნდა ახორციელებდნენ ეფექტიანად და მოქალაქე წლების მანძილზე არ უნდა ელოდებოდეს სამართლიან გადაწყვეტილებას.

შსს-ში ამბობენ, რომ აღნიშნული სამი თანამშრომელი მათ უწყებაში დიდი ხანია აღარ მუშაობს.