გერმანიამ ზელიმხან ხანგოშვილის 12 ნათესავი დაადეპორტა. ხანგოშვილი ჩეჩენი საველე მეთაური იყო, რომელიც ბერლინში რუსეთის მიერ ორგანიზებულ მკვლელობაში დაიღუპა.

გერმანული მედიის ინფორმაციით, დეპორტირებულებს შორის მისი ძმა — ზურაბ ხანგოშვილიცაა.

Deutsche Welle-ს ცნობით, ზელიმხან ხანგოშვილის ქვრივი, მანანა (რაისა) ციატიევა აცხადებს, რომ 23 ოქტომბერს გერმანიის პოლიციამ ზურაბ ხანგოშვილის ბინის კარი ძალით შეამტვრია და ფიზიკური ძალა გამოიყენა მისი 24 წლის შვილის მიმართ.

ციატიევამ ოჯახის წევრზე დაყრდნობით თქვა, რომ დაკავების დროს სამართალდამცველებმა მათ მობილური ტელეფონები ჩამოართვეს, შემდეგ კი აეროპორტში გადაიყვანეს და ჩარტერული რეისით საქართველოში გამოგზავნეს. Deutsche Welle აღნიშნავს, რომ ოჯახის ადვოკატები დეპორტაციის შეჩერებას ბოლო მომენტამდე ცდილობდნენ, თუმცა უშედეგოდ.

ხანგოშვილები გერმანიაში დაახლოებით სამი წლის წინ შვედეთიდან გადავიდნენ. Deutsche Welle-ს ცნობით, ყველა მათგანი საქართველოს მოქალაქეა. არსებული ინფორმაციით, ზურაბ ხანგოშვილი გერმანიაში ყოფნის დროს საკუთარ უსაფრთხოებაზე ნერვიულობდა.

24 ოქტომბერს გამართულ პრესკონფერენციაზე გერმანიის შსს-ს წარმომადგენელმა ჟურნალისტებს განუცხადა, რომ საქართველოს მიმართულებით განხორციელებულ რეისზე სულ 48 ადამიანი გააძევეს. მან აღნიშნა, რომ კონკრეტული პირების ვინაობაზე ვერ ისაუბრებდა და დასძინა, რომ დეპორტირებულთა რაოდენობის ზრდა პარლამენტში არჩეული პარტიების კოალიციურ შეთანხმებას უკავშირდება. ბრანდენბურგის ფედერალური შტატის ხელისუფლებამ კომენტარზე უარი განაცხადა.

გერმანიის ოფიციალური უწყებების მხრიდან დეპორტირებულთა ზუსტი ვიზის სტატუსი და გაძევების მიზეზები განმარტებული არ არის. ცნობილია მხოლოდ ის, რომ ბერლინმა უკანონო მიგრაციასთან მიმართებით უფრო მკაცრი ზომების მიღება დააანონსა, თუმცა ხანგოშვილების ოჯახის გაძევების კონკრეტული საფუძველი უცნობია.

ზელიმხან ხანგოშვილი 2019 წლის 15 აგვისტოს ბერლინში მოკლეს. ამ შემთხვევამ დიპლომატიური სკანდალი და რუსეთ-გერმანიის ურთიერთობების სერიოზული გაუარესება გამოიწვია. გერმანიის ფედერალური პროკურატურის წარმომადგენელმა განაცხადა, რომ მკვლელობა რუსეთის სახელმწიფოს ბრძანებით შესრულდა.

მკვლელობის შემდეგ გერმანიის პოლიციამ დააკავა რუსი მოქალაქე ვადიმ კრასიკოვი დააკავა. ბერლინის სასამართლომ დაადგინა, რომ დანაშაული მოსკოვის მიერ იყო ორგანიზებული. კრასიკოვი ადრე რუსეთის ფედერალური უსაფრთხოების სამსახურის (FSB) ელიტური დანაყოფის "ალფას" წევრი იყო. ის მოგვიანებით 2024 წელს რუსეთში პატიმრების გაცვლისას დაბრუნდა, სადაც მას პირადად ვლადიმირ პუტინი მიესალმა.

პუტინმა განაცხადა, რომ ზელიმხან ხანგოშვილი მოსკოვის მეტროს აფეთქებების ერთ-ერთი ორგანიზატორი იყო, თუმცა ამ განცხადების დამადასტურებელი მტკიცებულება განცხადებისთვის არ დაურთავს. ასევე არ განმარტა, რომელ აფეთქებებს გულისხმობდა — 2004 წლის ორ შეტევას, სადაც ჯამში 60-ზე მეტი ადამიანი დაიღუპა, თუ 2010 წლის აფეთქებებს, რომლებმაც 40 ადამიანი იმსხვერპლა. გერმანიის სასამართლომ ეს განცხადებები გადაწყვეტილების მიღებისას არ განიხილა.

ამ დროისთვის ზურაბ ხანგოშვილისა და მისი ოჯახის ბედი საქართველოში გაურკვეველია. კომენტარი მათ დეპორტაციაზე არც რუსულ მხარეს გაუკეთებია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.