"ვისთვისაც ქრისტე და მისი სიყვარული ნამდვილად ძვირფასია, მისთვის ეს [დიუშენით დაავადებული ბავშვების მხარდამჭერი აქცია] უბრალოდ სოციალური აქცია არ არის — ეს არის შესაძლებლობა, რომ სიყვარული ოჯახის საზღვრებს გასცდეს", — დაწერა დეკანოზმა გიორგი წეროძემ სოციალურ ქსელში.

მისი განმარტებით, "ეკლესიური სიყვარული იწყება იქ, სადაც სხვისი შვილი, უცხო, სუსტი, მტერი — უკვე უგულებელსაყოფი აღარ არის. ქრისტიანისთვის ოჯახი იქ იწყება, სადაც სხვისი შვილი შენს შვილადაც იქცევა."

"ოჯახი სიყვარულის სახელოსნოა. მაგრამ თუ ეს სიყვარული ოჯახის წევრების ფარგლებს ვერ გასცდება და "სხვის შვილამდე" ვერ მიაღწევს, მაშინ ის უკვე ეკლესიური ოჯახი აღარ არის.

ოჯახებად ცხოვრება ქრისტიანობის გამოგონილი არ არის. ეს ჩვენი ბიოლოგიური ისტორიის ნაწილია —ჩვენ და ჩვენი მსგავსი სახეობები ასე ვითარდებოდნენ: მცირე ჯგუფებად, ნათესაობრივი კავშირებით, "ჩვენიანების" დაცვით და უცხოებისადმი უნდობლობით. ოჯახი ევოლუციური ერთეულიც არის.

ქრისტიანობა იქ იწყება, სადაც ეს ბუნებრივი წრე ირღვევა.

ეკლესიური სიყვარული იწყება იქ, სადაც სხვისი შვილი, უცხო, სუსტი, მტერი — უკვე უგულებელსაყოფი აღარ არის. ქრისტიანისთვის ოჯახი იქ იწყება, სადაც სხვისი შვილი შენს შვილადაც იქცევა.

ხვალ, 18:00 საათზე, რუსთაველის მეტროდან მთავრობის კანცელარიამდე გაიმართება დიუშენის კუნთოვანი დისტროფიის მქონე ბავშვების მხარდასაჭერი მსვლელობა.
ვისთვისაც ქრისტე და მისი სიყვარული ნამდვილად ძვირფასია, მისთვის ეს უბრალოდ სოციალური აქცია არ არის — ეს არის შესაძლებლობა, რომ სიყვარული ოჯახის საზღვრებს გასცდეს", — დაწერა მამა გიორგი წეროძემ დიუშენის კუნთოვანი დისტროფიის მქონე ბავშვების მხარდამჭერ აქციასთან დაკავშირებით.

შეგახსენებთ, დღეს 17 მაისს, ოჯახის სიწმინდის დღესთან დაკავშირებით მოქალქეები ქაშუეთთან შეიკრიბნენ და მსვლელობით სამების საკათედრო ტაძარში მივიდნენ. მსვლელობას წინ სასულიერო პირები მიუძღვოდნენ.