მთავრობის მეთაურმა, ირაკლი კობახიძემ ჟურნალისტებთან საუბრისას განაცხადა, რომ მონანიებისა და დანაშაულის აღიარების შემთხვევაში პატიმრების შეწყალებაზე სათანადო რეაგირება ექნებათ.

ტვ პირველის ჟურნალისტის კითხვაზე, რატომ არ შეეხოთ მსგავსი მიდგომა პროევროპულ აქციებში მონაწილეობისთვის დაკავებულ დანიელ მუმლაძეს და გურამ ხუტაშვილს, რომელთაც ბრალი 112-ის კამერების დაზიანებაში ედებოდათ მიუხედავად იმისა, რომ ბრალდებულებმა დანაშაული აღიარეს და ზარალის ანაზღაურებისთვის მზად იყვნენ, კობახიძემ განაცხადა, რომ სასამართლო "მკაცრი სამართლებრივი სტანდარტებით" მოქმედებს და შეწყალებაზე "პოლიტიკური და სხვადასხვა ფაქტორები მოქმედებს".

"კონკრეტული შემთხვევებით სასამართლოზე ჩვენ ვერაფერ კომენტარს ვერ გავაკეთებთ, სასამართლო მოქმედებს მკაცრად სამართლებრივი სტანდარტებით, მაგრამ თუ საქმე შეეხება შეწყალებას, ამ შემთხვევაში, ბუნებრივია, გადაწყვეტილება არის პოლიტიკური და შეიძლება სხვადასხვა ფაქტორი მიიღოს მხედველობაში საქართველოს პრეზიდენტმა. ეს არის ძალიან მარტივი დამოკიდებულება. სასამართლო ვერ იხელმძღვანელებს, რა თქმა უნდა, პოლიტიკური მიზანშეწონილობით, თუმცა ამის საშუალება აქვს პრეზიდენტს. მთავარი არის მონანიება, სინანული და დანაშაულის აღიარება," — განაცხადა კობახიძემ.

• პროევროპულ აქციებში მონაწილეობისთვის დაკავებულ დანიელ მუმლაძეს და გურამ ხუტაშვილს 112-ის კამერების დაზიანებისთვის 3-3 წელი მიესაჯათ

შეგახსენებთ, რომ მოსამართლე ლილი მსხილაძემ დანიელ მუმლაძეს და გურამ ხუტაშვილს საპროცესო შეთანხმებაზე უარი უთხრა და ბრალდებულებს 3-3 წლით თავისუფლების აღკვეთა მიუსაჯა.

ჟურნალისტებმა კობახიძეს ასევე ჰკითხეს — როგორ მოიქცევა მთავრობა იმ შემთხვევაში, ახლად არჩეული კათალიკოს-პატრიარქი შიო III მათ პატიმრების შეწყალებისკენ თუ მოუწოდებს. მთავრობის მეთაურმა ჟურნალისტებს მიუთითა, რომ "ეკლესიის სახელით არ ილაპარაკონ" და განმარტა, რომ მათ მხოლოდ "ბოდიში არ სჭირდებათ" და სინანული დანაშაულის პრევენციისთვისაა მნიშვნელოვანი.

"თქვენ გახსოვთ, იყო რევოლუციის ერთი მცდელობა, როცა სულ ერთი ადამიანი იყო დაპატიმრებული, გადაწვეს ამის ნახევარი ქალაქი. ერთი ადამიანი იყო დაპატიმრებული და ამან წაახალისა ძალადობრივი რევოლუციის კიდევ ერთი მცდელობა. შემდეგ იყო დაპატიმრებული ექვსი ადამიანი. ესეც არ იყო სათანადო რეაგირება სახელმწიფოს მხრიდან, ამან წაახალისა ძალადობრივი რევოლუციის მესამე მცდელობა. ამის შემდეგ დაპატიმრებული იქნა დაახლოებით 30 ადამიანი და ამან თავისი პრევენციული ეფექტი იქონია. სადაც იქნება სინანული... სინანული რატომ არის მნიშვნელოვანი? ჩვენ ვინმეს ბოდიში კი არ გვჭირდება ან რაიმე ამდაგვარი, ეს არის მნიშვნელოვანი პრევენციისთვის. როდესაც ადამიანები დაგვანახებენ და სხვას აჩვენებენ, რომ ისინი ნანობენ ჩადენილ დანაშაულს, ამას ექნება თავისი პრევენციული ეფექტი. ჩვენი მთავარი ამოცანაა, რომ აღარავის გაუჩნდეს ასეთი ცდუნება, რომ ძალადობრივად სცადოს ქვეყანაში გადატრიალების მოწყობა. ამისთვის არის მნიშვნელოვანი სასჯელი. რა თქმა უნდა, სინანული არის ის, რაც ხელს შეუწყობს პრევენციის ეფექტს. ეს არის ჩვენი ამოსავალი წერტილი," — განაცხადა კობახიძემ.

• "შენდობას ყოველთვის წინ უნდა უძღოდეს სინანული" — შალვა პაპუაშვილი პატიმრების შეწყალებაზე
• მამუკა მდინარაძე: სადაც პრეზიდენტის დისკრეციული უფლება არსებობს, მას პატიმრების შეწყალების რეკომენდაციაც კი შეიძლება ეზედმეტოს