2025 წელს ევროკავშირის ტერიტორიაზე შესვლაზე უარი 132 600 მესამე ქვეყნის მოქალაქეს ეთქვა, მათ შორის საქართველო მეორე ადგილზეა — ინფორმაციას Eurostat ავრცელებს.

კვლევის მიხედვით, ბლოკიდან გაბრუნებული მესამე ქვეყნის მოქალაქეების რაოდენობა 2024 წელთან შედარებით 7,1%-ით მეტია. მესამე ქვეყნებში დაბრუნებულ მოქალაქეებს შორის უმეტესობა თურქეთის (13 405), საქართველოს (10 475), სირიის (8 370) და ალბანეთის (8 020) მოქალაქეები იყვნენ.

ფოტო: Eurostat

"მესამე ქვეყანაში გაბრუნება" გულისხმობს შემთხვევას, როდესაც ევროკავშირის არაწევრი ქვეყნის მოქალაქემ, რომელიც არალეგალურად იმყოფებოდა ევროკავშირის წევრ სახელმწიფოში, ოფიციალურად დატოვა ევროკავშირის ტერიტორია და გადავიდა იმ ქვეყანაში, რომელიც ევროკავშირის წევრი არ არის.

წინა წლებში საქართველო პირველ ადგილზე იყო: 2024 წელს ევროკავშირიდან საქართველოს 12 050 მოქალაქე გააბრუნეს, 2023 წელს — 10 360 იყო.

2025 წელს, იმ მოქალაქეებს შორის, რომელთაც ევროკავშირის გარე საზღვრებზე შესვლაზე უარი უთხრეს, საქართველოს მოქალაქეები მეშვიდე ადგილზე იყვნენ 4 785 უარით.

ევროკავშირის ქვეყნებში არალეგალურად მყოფად გამოვლენილი ადამიანების რაოდენობა 21,7%-ით შემცირდა — 2024 წლის 918 525-დან 2025 წლის 719 395-მდე.

ამას გარდა, 2025 წელს ევროკავშირის ქვეყნებიდან გასვლის ბრძანება 491 950 მესამე ქვეყნის მოქალაქეს გადაეცა, რაც 2024 წელთან (464 985) შედარებით 5,8%-იანი ზრდაა.

Eurostat-ისვე ცნობით, მესამე ქვეყნებში დაბრუნებულთა რაოდენობა 21%-ით გაიზარდა. ევროკავშირის დატოვების ბრძანების შემდეგ, 135 460 მესამე ქვეყნის მოქალაქე მესამე ქვეყანაში (არაწევრ სახელმწიფოში) დააბრუნეს, რაც 2024 წლის 112 040 ადამიანთან შედარებით 20,9%-ით მეტია.

მესამე ქვეყანაში დაბრუნებულთა ყველაზე დიდი რაოდენობა გერმანიამ დააფიქსირა — 29 295 ადამიანი. მას მოჰყვება საფრანგეთი (14 940) და შვედეთი (11 250).