განათლების, მეცნიერებისა და ახალგაზრდობის სამინისტროს შპს "საგანმანათლებლო რესურსების" მიერ 2026 წლის 3 აპრილს გამოცხადდა კვლევა 2026-2027 სასწავლო წლისთვის საჯარო სკოლების დაწყებითი საფეხურის მოსწავლეებისთვის 1 801 000 ცალი სასკოლო ფორმის შესყიდვის სავარაუდო ღირებულების დადგენის მიზნით.

2026 წლის 14 მაისს ბაზრის კვლევის პროცესში კომპანიამ, რომელმაც ყველაზე დაბალი ფასი წარმოადგინა, ბაზრის კვლევით გათვალისწინებული მოთხოვნები ვერ დააკმაყოფილა და შესყიდვის პროცედურაში მონაწილეობაზე უარი განაცხადა.

გვსურს საზოგადოებას ვაცნობოთ, რომ უახლოეს დღეებში შპს "საგანმანათლებლო რესურსების" მიერ გამოცხადდება ახალი ბაზრის კვლევა სასკოლო ფორმების შესყიდვის მიზნით.

2026 წლის 5 თებერვალს "ზოგადი განათლების შესახებ" კანონში შეტანილი ცვლილების საფუძველზე 2026–2027 სასწავლო წლიდან საჯარო სკოლის დაწყებითი საფეხურის მოსწავლეებისთვის სასკოლო ფორმის ტარება სავალდებულო გახდა.

პირველიდან მე-6 კლასის ჩათვლით მოსწავლეებისთვის სასკოლო ფორმების ესკიზები მიმდინარე წლის აპრილში გახდა ცნობილი. შპს "საგანმანათლებლო რესურსებმა" 1 801 000 ცალი სასკოლო ფორმის შესყიდვის სავარაუდო ღირებულების დასადგენად კვლევა 3 აპრილს გამოაცხადა, "რადიო თავისუფლებას" ცნობით, ამაში 44 მილიონ 900 000 ლარი დაიხარჯებოდა.

სატენდერო დოკუმენტის მიხედვით, 292 ათასი გოგონას პიჯაკის, 308 ათასი ბიჭის პიჯაკის, 438 ათასი გოგონას შარვლის, 616 ათასი ბიჭის შარვლის, 146 ათასი მუხლამდე ქვედაკაბის და 1000 გრძელი ქვედაკაბის შესყიდვა მოხდება.

IPN: სასკოლო ფორმების დიზაინი ცნობილია