საქართველოს საგარეო საქმეთა ყოფილი მინისტრი მიხეილ (პაპუნა) ჯანელიძე ტროტუარზე დგომის გამო ევროინტეგრაციის საკითხებში ყოფილი სახელმწიფო მინისტრის ალექსი პეტრიაშვილის დაკავებას ეხმაურება.

"ალექსი პეტრიაშვილი ტროტუარზე დგომისთვის დააკავეს, სტუდენტებს იგივე მიზეზით აკავებენ და საზოგადოების უდიდესი ნაწილი დუმილით ხვდება ამ ფაქტებს და თითქოს შეეგუა. ეს უფრო შიშთან შეგუებაა. "ქართული ოცნება" მეთოდურად და სწრაფი ნაბიჯით აგრძელებს შიშის დანერგვას. ეს შიში კი საზოგადოებას გაანადგურებს, თუ საზოგადოება არ გამოფხიზლდა და ამ შიშს თვალებში არ ჩახედა. აქ აღარ არის გემოვნების საკითხი, ვინ მოგწონს პოლიტიკურად და ვინ არა. ყველა, ვინც არ აპირებს ამ შიშს შეეგუოს, უნდა გაერთიანდეს.

ალექსი პეტრიაშვილი ტროტუარზე დგომისთვის დააკავეს, სტუდენტებს იგივე მიზეზით აკავებენ. "ქართული ოცნება" მეთოდურად აგრძელებს შიშის დანერგვას. ეს შიში კი საზოგადოებას გაანადგურებს", — წერს მიხეილ (პაპუნა) ჯანელიძე სოციალურ ქსელში.

ოპოზიციონერ პოლიტიკოსს, ევროინტეგრაციის საკითხებში ყოფილ სახელმწიფო მინისტრს, ალექსი პეტრიაშვილს 3-დღიანი ადმინისტრაციული პატიმრობა 14 მაისს შეეფარდა. მას შსს 17 დეკემბერს აქციაზე ტროტუარზე დგომას ედავებოდა.
ალექსი პეტრიაშვილი საქართველოს სახელმწიფო მინისტრის პოსტს ევროპულ და ევროატლანტიკურ სტრუქტურებში ინტეგრაციის საკითხებში 2012-2014 წლებში იკავებდა. 2004-2009 წლებში იყო საქართველოს საგანგებო და სრულუფლებიანი ელჩი თურქმენეთსა და ავღანეთის ისლამურ რესპუბლიკაში. რაც შეეხება პაპუნა ჯანელიძეს, ის 2015-2018 წლებში საგარეო საქმეთა მინისტრის პოსტს იკავებდა.