აზერბაიჯანის პარლამენტმა კანონპროექტი მიიღო, რომელიც კასპიის ზღვის ხელოვნურ კუნძულებზე კაზინოების გახსნის საშუალებას იძლევა. კანონპროექტი მესამე და საბოლოო მოსმენით სამშაბათს დამტკიცდა.

რადიო თავისუფლების ინფორმაციით, კაზინოები მხოლოდ სპეციალური ლიცენზიის საფუძველზე იმუშავებს და სახელმწიფო კონტროლი, ლიცენზიის მოთხოვნის მომენტიდან დაწყებული, მათი ფუნქციონირების მთელი პერიოდის განმავლობაში მოხდება.

კანონის თანახმად, კაზინოების მფლობელობა და მართვა მხოლოდ იმ იურიდიულ პირებს შეეძლებათ, რომლებიც შეესაბამებიან ფინანსური გამჭვირვალობის და სხვა შესაბამის მოთხოვნებს.

პროსამთავრობო მედია სააგენტო APA იუწყება, რომ აზარტული თამაშების ლიცენზიის წლიური ღირებულება ₼340,000-ს (დაახლოებით $200,000) შეადგენს.

"დადგენილი სახელმწიფო მოსაკრებლის წლიური ნაწილი გადაიხდება ყოველწლიურად ლიცენზიის გაცემის დღიდან", — ნათქვამია კანონში.

კაზინოებში თამაში მხოლოდ 21 წელს ზემოთ პირებისთვის იქნება დაშვებული.

კანონმდებლობა ასევე განსაზღვრავს, რომ კაზინოები იმუშავებენ მხოლოდ ხელოვნურ კუნძულებზე, რომლებიც კასპიის ზღვის სანაპიროზე მდებარეობს.

ამჟამად მიმდინარეობს რამდენიმე პროექტი ხელოვნური კუნძულებისა და ნახევარკუნძულების შესაქმნელად კასპიის ზღვაში, მათ შორის ერთ-ერთი აზერბაიჯანელ რუს ბიზნესმენს ემინ აღალაროვს — პრეზიდენტ ალიევის ქალიშვილის, ლეილა ალიევას ყოფილ მეუღლეს უკავშირდება.

პროსამთავრობო გამოცემა Modern.az-ის ცნობით, დეპუტატებმა აღნიშნეს, რომ კაზინოების გახსნა გაზრდის საბიუჯეტო შემოსავლებს, განავითარებს ტურიზმის პოტენციალს და შექმნის ახალ სამუშაო ადგილებს.

როდესაც Pravda.az-ის ჟურნალისტებმა პარლამენტარს ტაჰირ რზაიევს ჰკითხეს, იგეგმებოდა თუ არა კაზინოების გახსნა მთიან ყარაბაღში ტურიზმის განვითარების მიზნით, მან პასუხად თქვა, რომ ეს "მიუღებელია".

"ტურიზმის განვითარება შეიძლება ჯანსაღი მეთოდებით. პირველ რიგში, ადამიანების უმრავლესობას სძულს კაზინოები, რადგან ეს არის აზარტული თამაშები. ბევრი ადამიანი კარგავს ყველაფერს, იხდის ვალებს, თავს იკლავს ან მძიმე მდგომარეობაში ვარდება. არასწორია კაზინოების ლეგალიზაცია მიწებზე, რომლებიც ჩვენი ერისთვის წმინდაა და ოკუპაციისგან გათავისუფლდა", — განაცხადა რზაიევმა.

აზერბაიჯანში კაზინოები 1998 წლიდანაა აკრძალული, როდესაც ქვეყნის მაშინდელმა პრეზიდენტმა ჰეიდარ ალიევმა გამოსცა შესაბამისი დადგენილება.

დადგენილებაში აღნიშნულია, რომ გადაწყვეტილება მიღებულ იქნა "აზერბაიჯანელი ხალხის ზნეობაზე მავნე გავლენის თავიდან ასაცილებლად და ეკონომიკაში სხვადასხვა გადახრის პრევენციის მიზნით — დანაშაულთან ბრძოლის გაძლიერებისა და საბაზრო ურთიერთობების ჩამოყალიბების ფონზე".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება.

საქართველოში OC Media-ის პარტნიორი On.ge-ა. სტატია ინგლისურად შეგიძლიათ წაიკითხოთ აქ.